Футболист Мұхаммед Салах үйіне түскен ұрыға ақша беріп, жұмысқа тұрғызған
Футбол жанкүйерлеріне Мұхаммед Салахтың есімі жақсы таныс. Ол Африканың да 2017 жылғы үздік футболшысы атанды
2017 жылдың нәтижесі бойынша ең үздік араб футболшыларының тізімін жасаған араб елдерінің спорт журналистері «Ливерпуль» мен Мысыр құрама командасының шабуылшысы Мұхаммед Салахты бірінші орынға қойды, деп жазады Алматы ақшамы газеті.
Ол Африканың да 2017 жылғы үздік футболшысы атанды. Ағылшын премьер-лигасының қазіргі маусымындағы ең үздік «бомбардирі» Мұхаммед Салах Мысыр құрамасының Ресейдегі Әлем чемпионатында ойнауына жол ашты. 25 жастағы жігіттің атақ-даңқы мұнымен шектеліп тұрған жоқ.
Әлеуметтік желілерде айтылғандай, ол футболда қақпа көздеп жүргенде, кәнігі ұрының бірі оның пәтерін көздеп жүріпті. Үйін үптеп кеткен ұрының үстінен оның әкесі сотқа шағым түсірген. Алайда, Мұхаммед әкесіне айтып, сотқа түсірген шағымды қайтадан кері алдырады. Ал үйіне түскен ұрыға қолұшын беріп, қаржылай көмектесіп, жұмыс табуына көмектеседі. Бұл ғана емес… оның өзгелерге ой салатын басқа да істері көп болып тұр.
Мысыр құрамасын Әлем чемпионатына шығарған Салахқа Египеттің беделді бизнесмені хабарласып, оның отбасына ғажайып вилла сыйлайтынын айтқан. Мұхаммед одан бірден бас тартып, егер жақсылық жасағысы келсе, туған жері Нагрикті дамытуға үлес қосуды өтінеді. Футболшы ол жерде мектеп салып, жан-жақты жабдықталған, төбесі жабық спорт залдарын ашып жатыр. Қомақты қаржысын емханаларға дәрі-дәрмек алуға, жедел жәрдем көліктерін сатып алуға бөлген. Сонымен бірге, жаңа үйленіп жатқан жас жұбайлардың некеге тұруына көмектесіп, үйлену тойларын өткізуді мойнына алып келеді. Бұлар да өз алдына, ол 2017 жылдың соңында экономикасы құлдыраған өз елінің аяғынан тік тұруына қолұшын беріп, шет ел валютасымен қомақты қаржы аударады. Мүгедек болып қалған футболшыларды үнемі демеп отыратын Мұхаммед Салахтың осындай адамгершілік қырларын Ораза айында айтпай кетудің өзі күнә сияқты.
Біздің еліміздегі кейбір қаржылы азаматтардың бар тапқанын шет ел асырып жіберіп жатқанына ішіңіз ашиды. «Қайсыбірін айтайын» демеске лаж жоқ…
Оқи отырыңыз:
Әлем чемпионының бапкері: Головкин бұрынғыдай мықты емес, ол көп соққы жібереді
Кентауда жедел жәрдем көлігі 2 жасар баланы қағып өлтірді
Мектеп мұғалімі оқушылардың маңдайына екілік баға қойып берген