Ресейде туған, қазіргі уақытта Біріккен Араб Әмірліктерінің азаматы Дуров 2024 жылдың тамыз айында Париж маңындағы әуежайда тұтқындалған болатын. Франция билігі оған Telegram арқылы қылмыстық әрекеттерге жол берді деген алдын ала айыптар тақты. Бұл айыптарға есірткі саудасы, ақшаны заңдастыру және балаларды жыныстық қорлауға байланысты материалдарды тарату жатады. Дуров бұл айыптарды үзілді-кесілді жоққа шығарған.

Франция сотының шешімімен оған елден шығуға тыйым салынып, 5 миллион еуро көлемінде кепіл төлеу міндеттелді. Сондай-ақ ол апта сайын екі рет полиция бөлімінде белгіленуі тиіс болды. Алайда, 15 наурызда Франция билігі оның елден уақытша шығуына рұқсат берді.

"Мен бірнеше ай бойы Францияда болдым, себебі Telegram платформасындағы қылмыстық әрекеттерге байланысты тергеу жүріп жатты. Бұл процесс әлі жалғасуда, бірақ үйге оралғаныма қуаныштымын", – деп жазды Дуров Telegram арнасында.

Францияның сот жүйесінде алдын ала айып тағу дегеніміз – қылмыс жасалғанына қатысты жеткілікті негіз барын білдіреді, алайда тергеу толық аяқталмағандықтан, қосымша дәлелдер жиналуы керек.

"Мен тергеуші судьяларға менің Франциядан уақытша кетуіме рұқсат бергені үшін алғыс айтамын", – деді Дуров.

Дуровтың сот бақылауы 7 сәуірге дейін тоқтатылғаны белгілі болды. Париж прокуратурасының мәліметінше, 15 наурыздан бастап оның полицияға белгіленіп тұру міндеті уақытша алынған. Дегенмен, оған тағылған айыптар бойынша тергеу жалғасуда және 10 жылға дейін бас бостандығынан айырылуы мүмкін.

Дуров француз билігінің өзіне қатысты сұрақтарына таңданысын білдіріп, Telegram платформасы арқылы заңсыз әрекеттермен күресу үшін арнайы жедел байланыс желісін құрғанын мәлімдеді. Ол егер кез келген елдің Telegram-ға қатысты шағымы болса, платформаға қарсы сотқа жүгінуі тиіс екенін, бірақ оның негізін қалаушысын жеке жауапкершілікке тартудың қисынсыз екенін айтты.

Еске салсақ, бұған дейін Telegram негізін қалаушы Павел Дуровтың Францияда ұсталғаны туралы жазған едік. Артынша оның қамаудан босатылғаны белгілі болды.

Талқылау