Полиграфологиялық зерттеу құқық қорғау органдарының, азаматтық қорғаныс органдарының, мемлекеттік фельдъегерлік қызметінің жұмысшылары жоғары басшылық лауазымдарға көтерілген кезде жүргізіледі. Сондай-ақ қызметтік тергеу жүргізу кезінде тергеу оның келісімімен жүзеге асырылатыны айтылған.

Жоғары басшылық лауазымдарға көтерілу кезінде мыналар анықталады:

құқық қорғау органдарында қызмет өткерудің жасырын теріс мотивтері (тыйым салынған қоғамдық бірлестіктердің, қылмыстық және террористік ұйымдардың және басқалардың қызметінің мүдделері үшін);
теріс тәуелділік, психикалық және физикалық тәуелділікті тудыратын есірткі, психотроптық және басқа да психоактивті заттарды пайдалану;
құқық қорғау органдарында толық қызмет атқаруға кедергі болатын жасырын аурулар, өз-өзіне қол жұмсауға бейімділігі;
кіріс, мүлік және мүліктік міндеттемелер туралы мәліметтерді жасыру, қос азаматтық, жалған құжаттарды пайдалану;
сыбайлас жемқорлық құқық бұзушылықтар жасау, құпия немесе қызметтік ақпаратты үшінші тұлғаларға беру фактілері;
сыбайлас жемқорлық құқық бұзушылықтарды жасағаны үшін қылмыстық жауаптылық фактілері;
тыйым салынған қоғамдық бірлестіктермен, қылмыстық және террористік ұйымдармен байланыста болу немесе коммерциялық құрылымдарға қатысу;
билікті асыра пайдалану.

Сондай-ақ, зерттеу барысында анықтауды қажет ететін қосымша тапсырмалар қойылуы мүмкін.

Полиграфологиялық сараптама қорытындысының жарамдылық мерзімі:

құқық қорғау органдарына, азаматтық қорғаныс органдарына, мемлекеттік фельдъегерлік қызметіне жұмысқа қабылданған азаматтар үшін – бір жыл;

құқық қорғау органдарының, азаматтық қорғаныс органдарының, мемлекеттік фельдъегерлік қызметінің жоғары тұрған басшылық лауазымдарына көтерілген қызметкерлері үшін үш жыл.

Құжат нормаларды "Құқық қорғау қызметі туралы" заңның 33 және 47-баптарына сәйкес келтіру мақсатында әзірленген.

Жоба 2025 жылдың 14 ақпанына дейін қоғамдық талқылау үшін Ашық НҚА порталында жарияланған.

Талқылау