Қытайдағы ең бай адам кім екені белгілі болды
ByteDance компаниясының негізін қалаушы, TikTok қосымшасының иесі Чжан Имин Қытайдағы ең бай адам деп танылды. Бұл туралы Stan.kz ақпарат агенттігі Hurun.net порталына сілтеме жасап хабарлайды.
Фото: Gilles Sabrie / Bloomberg
Hurun Research Institute зерттеу институты рейтинг жасап, ең бай адамдар тізіміне кіру үшін байлық шегі 5 миллиард юань (шамамен 700 миллион АҚШ доллары) болып белгіленді.
Айта кетейік, 41 жастағы Иминнің байлығы 49,3 миллиард долларға бағаланды. Өткен жылы ByteDance компаниясының ғаламдық кірісі 30% өсіп, 110 миллиард АҚШ долларға жуықтаған. Ол 2021 жылы компанияның бас директоры қызметінен кеткеніне қарамастан компанияның кірісінің артуы оның жеке байлығына айтарлықтай ықпал етті.
Ал бөтелкедегі суды өндіретін Nongfu Spring және Beijing Wantai Biological Pharmacy Enterprise фармацевтикалық компаниясының иесі, 70 жастағы Чжун Шаньшань үш жылдан бері алғаш рет көшбасшылық орнынан айырылып, екінші орынға түсті. Оның байлығы 47,9 миллиард долларға дейін төмендеп, өткен жылмен салыстырғанда 24% (немесе 15,5 миллиард доллар) азайды.
Еске салайық, бұған дейін әлемдегі өте бай адамдардың жартысынан көбі АҚШ пен Қытайда тұратынын жазған едік. Аса байлардың көбі Солтүстік Америкада тұрады. 253,1 мың адам бай екен, бір жыл бұрынғыдан 7,2% көп. Азия 165,4 мың және Еуропада 155,2 мың аса бай адам тұрады. Одан кейінгі орында Таяу Шығыс (18,8 мың адам), Аустралия (17,9 мың адам), Оңтүстік Америка (13,2 мың адам) және Африка (3 мың адам) бар.