Ел президенті қайда екені белгісіз: АҚШ Венесуэла астанасына шабуыл жасады (видео)

Фото: Видеодан скрин

АҚШ-тың Орталық барлау басқармасына тиесілі ұшқышсыз ұшу аппараты Венесуэла жағалауындағы бір айлаққа соққы жасады. Бұл туралы Stan.kz ақпарат агенттігі BBC басылымына сілтеме жасап хабарлайды. 

АҚШ Венесуэланың бірнеше штатында азаматтық және әскери нысандарға соққы жасады. Ел астанасы Каракаста жеті жарылыс болған. Куәгерлердің айтуынша, Венесуэла астанасындағы ірі әскери нысандардың үстінен түтін көтерілген. Олардың қатарында Ла-Карлота әуе базасы мен Фуэрте-Тьюна әскери базасы бар.

Бұл соққылар Венесуэланың қорғаныс министрінің үйіне және ел астанасындағы портқа да тиген.

Венесуэла президенті Николас Мадуро елде төтенше жағдай режимін жариялады. Десе де ол кейін мүлде хабарсыз кеткен. Жергілікті БАҚ бірнеше жоғары лауазымды шенеуніктің қаза табуы мүмкін екенін жазып жатыр. Колумбия президенті Густаво Петроның айтуынша, АҚШ Венесуэла парламентінің ғимаратына да соққы жасаған. Қазір Венесуэла президентінің нақты қайда екені белгісіз. Дегенмен, жергілікті БАҚ дерегінше, оның айналасындағы адамдардың бір бөлігі қауіпсіз жерде. 

Бірнеше сағат бұрын ғана президент Мадуро Каракаста Си Цзиньпиннің арнайы өкілімен кездесу өткізген екен. Қытай делегациясының Венесуэладан кетіп, кетпегені әзірге белгісіз. 

АҚШ Венесуэланың бұрынғы президенті Уго Чавестің Каракастағы мавзолейіне де соққы жасаған. 

СNN мәліметінше, АҚШ үкіметі Венесуэла жағалауындағы шалғай айлақты Tren de Aragua қылмыстық тобы есірткі сақтап, оларды кемелерге тиеу үшін пайдаланғаны жөнінде барлау мәліметтерін алған. Шабуыл жасалған сәтте нысанда ешкім болмаған, сондықтан зардап шеккендер жоқ. 

Шын мәнінде АҚШ шабуыл жасады ма?

Өткен аптада АҚШ президенті Дональд Трамп бір сұхбатында осы операцияны меңзеген болуы мүмкін. 26 желтоқсанда ол АҚШ “кемелер келетін ірі бір нысанды жойғанын” айтқан. Ал 29 желтоқсанда бұл туралы қайта сұралғанда, Трамп АҚШ "есірткі тиеп жіберілетін айлақтар маңындағы ауданға соққы жасағанын” мәлімдеді. Алайда ол бұл операцияны нақты кім жасағанын айтудан бас тартты.

“Оны айтқым келмейді. Нақты кім болғанын білемін, бірақ оны жариялағым келмейді”, – деді Трамп.

CNN мәліметінше, операцияға АҚШ армиясының Арнайы мақсаттағы күштері барлау жағынан қолдау көрсеткен.

Алайда Арнайы мақсаттағы күштер қолбасшылығының өкілі, полковник Элли Вайскопф бұл мәлімдемені жоққа шығарды. 

“Арнайы мақсаттағы күштер бұл операцияға, соның ішінде барлау тұрғысынан да, ешқандай қолдау көрсеткен жоқ”, – деп жауап берген ол. 

Теңіздегі есірткі саудасына қарсы күрес

2025 жылдың қыркүйегінен бері АҚШ Кариб теңізінде және Тынық мұхитының шығыс бөлігінде 20-дан астам кемені жойған. Вашингтон бұл кемелердің есірткі саудасымен байланысы болғанын айтады. Осы операциялар барысында кемінде 100 адам қаза тапқан.

Вашингтонда теңіздегі соққылар АҚШ-қа заңсыз жолмен есірткі жеткізуге тырысқан қылмыскерлерге қарсы бағытталған шабуыл ретінде түсіндірілді. Ал Венесуэла бұл әрекеттерді АҚШ тарапынан жасалған қарақшылық деп атап, оларды айыптады.

Трамп бұған дейін де Венесуэла аумағындағы нысандарға соққы жасауы мүмкін екенін бірнеше рет ескерткен. 

Трамп Венесуэла аумағындағы операция туралы алғаш рет радиосұхбатта айтқан. Сол кезде ол "ірі құрылыс нысанына" соққы жасалғанын мәлімдеген. Бірақ егжей-тегжейін айтпаған.

АҚШ Кариб теңізіне ірі соққы беретін әскери кемелер тобын, әлемдегі ең ірі әуе тасымалдаушы USS Gerald R. Ford кемесін, авиация және 15 мыңнан астам әскери қызметкерді орналастырған.

Вашингтонның мәлімдеуінше, операцияға фентанил мен кокаиннің АҚШ-қа заңсыз жеткізілуі себеп болған. 

Бұған дейін Трамп әкімшілігі Венесуэланы мұнайдан түскен табысты есірткіге қатысты қылмыстарды қаржыландыруға пайдаланды деп айыптаған.

Ал Венесуэла президенті Николас Мадуро АҚШ-тың бұл айыптауларын үзілді-кесілді жоққа шығарды. 

“Вашингтонды “есірткіге қарсы соғысты” сылтау етіп, мені биліктен тайдырмақ. Сондай-ақ Венесуэланың мол мұнай қорына ие болуға тырысып отыр”, – деді ол.