"Денесінде бұған басшылық кінәлі деген жазуы бар": Түрмеден шығуына 20 күн қалған қазақстандық ер адам қаза тапты
Атбасардадағы түзеу мекемесінде өзінің жазасын өтеп жатқан Ержұман есімді ер азамат бостандыққа шығуына санаулы күндер қалғанда өз-өзіне қол жұмысап қаза тапты. Марқұмның қарындасы осы оқиға бойынша әлеуметтік желіге әділдік талап етіп бейнеролик жариялады. Stan.kz тілшісі ер адамның қарындасына хабарласып, мәселенің мән-жайын білді.
Қарындасының сөзінше, Ержұман осы қазан айының соңына қарата бостандыққа шығатын болған. Алайда 9 қазан күні өз-өзіне қол жұмсап, қаза тапқан.
“Анамның WhatsApp месенджеріне түзеу мекемесінің өкілі қаза болғаны туралы хат жазып жіберіпті. Кейін сол түзеу мекемесінің кезекшілеріне хабарласып мән-жайды сұрасам, дүйсенбі күні хабарласуымды сұрады. Ал ағамның қаза болғаны жайлы айтып бастап келе жатқанда, телефонды қоя салды”, – деді Ержұманның қарындасы.
Осы жағдайдан кейін бірден Ержұманның ағалары Астанаға жол тартып, оның денесі алып келген. Денесінде “Бұған кінәлі басшылық” деген жазу болған. Қарындасының сөзінше, жазуды ол өзі жазуы мүмкін.
“Естуімше, ағамды еден жууға мәжбүрлеген. Ол жерде 20-25 шақты жазасын өтеп жатқандар бар. Ағам еденді жуудан бас тартып, оған басқа жұмыс беруін өтінген, алайда оны уақытша ұстау изоляторына 1 күнге қамап тастаған. Сол жерде ол 10-15 минут ішінде өзінің сырт киімін шешіп, асылып қалған болып тұр”, – деді Ержұманның ағасы.
Ержұманның қарындасының сөзінше, марқұмның денесінің кей жерлері мен басы тігілген. Олардың отбасы бостандыққа шығуына санаулы күндер қалғанда оның өз-өзіне қол жұмсауына сенбейді.
“Ағам әскерге барып келген соң шаштаразбен айналысты, кейін Астанаға барып ойын-сауық орындарында балмұздақ, түрлі тәттілер сатып, өзінің бизнесін ашқан болатын. Сол жұмысын істеп жүргенде, жанындағы бір кісімен ерегісіп қалған болатын. Ол адам бизнесті алдап тартып алған”, – деді Ержұманның қарындасы.
Ержұманның қарындасының сөзінше, ағасы кәсібін сол адаммен бірге ашқан. Жанжалдан кейін Ержұман оны көлікке апарып сөйлесуге шақырған. Ашу үстінде ол көліктің ішінде отырып, серіктесінің аяғына қайшы сұғып алған. Осы жағдайдан кейін алған кәсіпті қайтарып беремін деп уәде берген, алайда көліктен шыққан соң бірден полиция қызметкерлеріне хабарласып, мән-жайды басқаша түсіндірген.
“Сот кезінде өз кінәсін мойындап, 3 жылға бас бостандығынан айырылған еді, міне биыл ол бостандыққа шығу керек болған”, – деп сөзін қорытындылады қарындасы.
Қазіргі уақытта марқұмның жақындары әділ тергеу болғанын қалайды. Редакция Қылмыстық-атқару жүйесі комитетінен пікір сұраған болатын, әзірге ешқандай жауап жоқ.
Еске сала кетейік, Қарағандыда 500-ден астам адамның сеніміне кірді деп айыпталған кәсіпкер әйелге 7 жылға бас бостандығынан айыру жазасы сұралды. Ол Қытайдан тауарларды арзан бағамен жеткізіп беруге уәде берген. Алайда азаматтар оған сеніп, жалпы сомасы бір миллиард теңгеге жуық ақша аударған.
