БҰҰ Гүлнәр Каримованың қамауға алынуын заңсыз деп таныды

Фото: Wikimedia commons

БҰҰ-ның негізсіз қамау жөніндегі жұмыс тобы Гүлнар Каримованың 2014 жылы тұтқындалуын заңсыз әрі оның құқықтарын өрескел бұзған деген қорытындыға келді. Құжатта Өзбекстанның тұңғыш президентінің қызы ордерсіз, тиісті сот ісі процедурасынсыз үйқамақта ұсталғаны айтылған. Сот отырыстарының бірі үйінің ас бөлмесінде өткен. Бұл туралы Stan.kz ақпарат агенттігі хабарлайды.

БҰҰ Адам құқықтарының жалпыға бірдей декларациясы да, Азаматтық және саяси құқықтар туралы халықаралық пакті де бұзылғанын анықтаған. Алайда Өзбекстан тарабы сарапшылардың бұл тұжырымдарымен келіспеді, бірақ БҰҰ сарапшылары моральдық шығынды өтеуді және тергеуді әділ жүргізуді талап етіп отыр.

Бұл ретте Каримова халықаралық қылмыстық істерге қатысқан адам болып қала береді: оған ірі сыбайлас жемқорлық схемалары үшін және телекоммуникация компанияларынан алынған жүздеген миллион долларды жылыстатқан деген айып тағылып отыр. Өзбекстанның бас прокуратурасы оның әрекетінен 1,6 миллиард доллардан астам шығын келген деп бағалады.

Гүлнәр Каримова бір кездері Өзбекстандағы ең танымал тұлғалардың бірі болды. Елдің тұңғыш президенті Ислам Каримовтың қызы дипломатия, шоу-бизнес және сән саласында мансабын құрды. Ол Googoosha лақап атымен музыка шығарып, GULI брендін құрды, Милан мен Нью-Йоркте сән көрсетілімдерін өткізген, тіпті Жерар Депардьемен бірге жұмыс істеген еді.