Бүлдіршін қатты жылады: Жас ата-ана стример байқауын жеңу үшін бір жасар ұлына татуировка жасады

Видеодан скриншот

Ресейде жас ата-аналар атақты стример Mellstroy (Андрей Бурим) өткізетін байқауға қатысу үшін бір жасар баласына татуировка салдырған. Бұл туралы Stan.kz ақпарат агенттігі хабарлайды.

Қауіпсіз интернет лигасының жетекшісі Екатерина Мизулина ата-ананың ерсі әрекетін Telegram-каналында жариялады.

Мизулинаның айтуынша, стример өзінің онлайн-казиносын жарнамалау үшін ірі ақшалай сыйлықтары бар байқау ұйымдастырған. Қатысушылар TikTok-та вирустық контент жасап, жұрттың назарын аудару керек екен. Жарияланған кадрларда татуировка салдырып жатқан кезде жылаған бала көрсетілген.

"Ел бойынша мыңдаған жасөспірім бірнеше күннен бері шашын қырып, төлқұжаттарын жыртып, дүние-мүлкін бүлдіріп, өздерін өртеп жатыр. Бұл одан сайын нашарлай түседі, видеороликтер күн өткен сайын зорлық-зомбылыққа толы пен абсурдқа айналып барады. Енді олар төлқұжаттарды ғана емес,рельстерді де өртей ме?" – деді қауіпсіз интернет лигасының басшысы.

Видеодағы сәбидің анасы өз әрекетін қаржылық қиындықтармен түсіндірді. Ол байқауға тұрғын үй мәселесін шешемін деген үмітпен қатысқанын мәлімдеді.

Блогердің өзі де ата-аналардың әрекетін айыптап, қатысушылардың шектен шықпау керегін айтқан. Мизулина барлық жиналған материалды тергеу комитетіне процессуалдық тексеруге жіберуге уәде берді.