Бейжің олимпиадасына қатысқан тағы 6 спортшыдан допинг табылды
Бейжің олимпиадасына қатысқан тағы 6 қазақстандық спортшыдан допинг табылды. Бұл туралы Қазақстан ұлттық олимпиада комитеті (ҰОК) ресми сайтына сілтеме жасап, «Аламан» хабарлады.
Ұлттық олимпиада комитетінің мәлімдеуінше, қазақстандық алты спортшының Бейжің олимпиадасы кезіндегі алынған допинг сынамаларын қайта тексергенде күдік тудырған. Енді Халықаралық олимпиада комитеті мен Бүкіләлемдік антидопинг агенттігі В сынамасын тексеру процесін жүргізеді.
Бұл шара 18-26 шілдеде Лозаннада (Швейцария) қазақстандық тараптың қатысуымен өтеді. Қазақстан ұлттық олимпиада комитеті В сынамасы оң нәтиже берген жағдайда ғана спортшылардың аты-жөнін жариялайды. Дегенмен бір спортшының есімі белгілі. Ол – ауыр атлет Владимир Седов.
Естеріңізге сала кетейік, осыған дейін Халықаралық ауыр атлетика федерациясы (IWF) қазақстандық ауыр атлет Илья Ильиннің Бейжің мен Лондон олимпиадалары кезінде алынған сынамаларынан допинг табылғанын мәлімдеген. Лондонда алтын алған қазақ спортшылары Зүлфия Чиншанло, Мая Манеза мен Светлана Подобедованың да сынамалары оң нәтиже берген. Олар уақытша жарыстардан шеттетілген.