Шетелге шығуды жоспарлағандар авторлық тур ұйымдастырған қызға 2 миллион теңгеге дейін қаражат аударғандарын айтады. Алайда алып-ұшып Алматы әуежайына келген кезде алданғандарын біліпті.

"Балидегі демалыс арман болып қалды" деген жандар енді полицияның табалдырығын тоздырып жүр. Бұл жандар бағасы тиімді авторлық турды инстаграм арқылы тапқан. Әрі саяхатты ұйымдастырған қыз көрікті жерлерді көрсетемін деп сендірген екен. Осылайша, бір топ адам еш күмәнданбастан ақшаларын аударғанын айтады.

“Біздің отбасымызға бір миллион ақша қарыз. Алматыдан келгеннен кейін жан жағымыздан алданған жалғыз біз емес екенімізді білдік. Бізді чатқа қосады. Чатта 65 адам бар. 65 адам список жазады. Кім қанша қарыз екенін. Қаншама реклама жүріп жатыр. Ол қыз әлі жұмыс жасап жатыр. Ол қаншама халықты алдап жатыр”, – дейді Ақтөбе қаласының тұрғыны Мира Бақытқалиқызы.

Жәбірленушілер ұйымдастырушы қыздың қажылыққа барған суретін көргеннен кейін адалдығына ешқандай күдік ұяламады дейді. Тіпті қыздың өзі Малайзиядан видео арқылы байланысқа шығып, саяхатқа қызықтырған көрінеді. Ал полиция "алаяқтық" бабы бойынша іс қозғап, күдіктіні іздестіріп жатыр.

“Сотқа дейінгі тергеу барысында агенттік шетелдік азамат демалыс ұйымдастырып беруді уәде етіп, олардан алдын ала төлем алғаны анықталды. Алайда жәбірленушілер шетелге демалысқа да, өз ақшасын да қайтарып ала алмаған. Қазір күдіктінің жеке басы анықталды. Оны ұстауға бағытталған шаралар жүргізіліп жатыр”, – дейді Ақтөбе облысы полиция департаменті баспасөз қызметінің жетекшісі Ерболат Сарқұлов.

Еске салсақ, бұған дейін әйел желіде танысқан алаяққа алданып, 77 миллион теңге аударып жібергені туралы жазған едік.

Талқылау