"Балға ұстаған маньяк кезіп жүр": Тараз полициясы желіде тараған ақпаратқа пікір білдірді
Жамбыл облысында мессенджерлерде "Таразды балға ұстаған маньяк кезіп жүр" деген ақпарат тарады. Халық арасында үрей тудырған хабарламадан соң құзырлы орган мәлімдеме жасады. Бұл туралы Stan.kz ақпарат агенттігі хабарлайды.
Фото: invite.viber.com
1 сәуірде қалалық саябақ маңынан басы жаншылған ер адамның мәйіті табылды. Осы жағдайдан соң мессенджерлерде қорқынышты хабарлама тарай бастады.
Фото: Скриншот
"Әлеуметтік желіде “Таразда балға ұстаған маньяк жүр, құрбан болғандар бар” деген ақпарат тарап жатыр. Жамбыл облыстық полиция департаменті бұл ақпараттың шындыққа жанаспайтынын хабарлайды. Облыс орталығындағы шағын аудандардың бірінен ер адамның мәйітінің табылуына қатысты қылмыстық іс тергеліп жатыр", – делінген мәлімдемеде.
Департамент қазіргі уақытта күдіктіні анықтау және ұстау үшін қажетті тергеу-жедел шаралардың толық кешені жүргізіліп жатқанын айтты. Тергеу барысы полиция департаменті басшылығының бақылауында.
Айта кетейік, бұған дейін 1 сәуірде Таразда "Жеңіс" саябағының жанындағы алаңда бұрынғы полиция қызметкерінің жаншылған денесі табылған еді.