Айза Мамбекова Азия Олимпиада кеңесінің Спортшылар комиссиясына кандидатқа ұсынылды
Азия ойындарының Спортшылар комиссиясына сайлау 2025 жылдың 7-14 ақпаны аралығында Қытайдың Харбин қаласында өтетін қысқы Азия ойындары аясында өтеді. Бұл туралы Stan.kz ақпарат агенттігі Қазақстанның ұлттық олимпиада комитетіне сілтеме жасап хабарлайды.
Фото: olympic.kz
Қазақстаннан бұл лауазымға Ұлттық Олимпиада комитетінің (ҰОК) Спортшылар комиссиясының мүшесі Айза Мамбекова ұсынылды.
Айза Мамбекова ұзақ уақыт бойы мәнерлеп сырғанау бойынша ұлттық құраманың қатарында болды. Ол 2017 жылғы Азия ойындары сияқты ірі халықаралық жарыстарда алған бай спорттық тәжірибенің арқасында маман және жас буынға тәлімгер ретінде қалыптасты.
2024 жылдың қараша айынан бастап Айза ҰОК Спортшылар комиссиясының құрамына кіріп, қазақстандық спортшылардың құқықтары мен мүдделеріне қатысты мәселелермен айналысуда.
Сонымен қатар, Айза Мамбекова мәнерлеп сырғанау командасының жетекшісі қызметін атқарып, осы спорт түрін елде дамыту бойынша жұмысын жалғастыруда.
Айта кетейік, ОСА Спортшылар комиссиясына сайлау қысқы ойындар кезінде арнайы ұйымдастырылған сайлау учаскелерінде өтеді.
