Әйгілі "Барселона" футбол клубы сатылады

Фото: “Барселона” фк

Атақты испаниялық "Барселона" футбол клубы сатылуы мүмкін. Бұл туралы Stan.kz ақпарат агенттігі хабарлайды.

Бұл туралы El Chiringuito бағдарламасының журналисі Франсуа Гальярдо X  әлеуметтік желісіндегі парақшасында хабарлады.

Журналистің мәліметінше, клубты Сауд Арабиясының тақ мұрагері Мұхаммед ибн Салман сатып алуға ниетті. Оның айтуынша, ол "Барселонаны" шамамен 10 миллиард еуроға бағалап отыр.

Гальярдоның сөзіне сүйенсек, қазіргі таңда "Барселонаның" 2,5 миллиард еуродан астам қарызы бар, әрі оны өтеу айтарлықтай қиын. Алайда бұл мәмілеге клубтың сосьостары маңызды шешімдер бойынша дауыс беру құқығына ие тіркелген мүшелері қарсы шығуы мүмкін. Себебі "Барселона" осы мүшелердің ұжымдық меншігі болып саналады.

Мұхаммед ибн Салман 2017 жылғы 21 маусымнан бері Сауд Арабиясының тақ мұрагері, ал 2022 жылғы 27 қыркүйектен бастап елдің премьер-министрі қызметін атқарып келеді. Ол Саяси және қауіпсіздік мәселелері жөніндегі кеңесті, сондай-ақ Экономика және даму мәселелері жөніндегі кеңесті басқарады.

"Барселона" футбол клубы 1899 жылы құрылған. Ол Испаниядағы ең көп титул иеленген клубтардың бірі және жалпы жүлделер саны бойынша екінші орында тұр.

Ішкі жарыстарда каталондық клуб 80 титул жеңіп алған: 28 ел чемпиондығы, 32 Испания кубогы, 15 Испания суперкубогы, Испания лигасының екі кубогы және Эва Дуарте атындағы үш кубок.

Халықаралық аренада "Барселона" 22 еуропалық және әлемдік трофейге қол жеткізген. Олардың қатарында УЕФА Чемпиондар лигасының бес титулы, рекордтық төрт УЕФА кубогы, бес УЕФА суперкубогы және үш клубтар арасындағы әлем чемпионаты бар.

Ағымдағы Ла Лига маусымында "Барселона" 17 турдан кейін 43 ұпай жинап, турнир кестесінде көш бастап тұр. Келесі ойынын команда 21 желтоқсанда сырт алаңда "Вильярреалға" қарсы өткізеді.

Бұған дейін клуб президенті Жоан Лапорта 2026 жылы өтетін президенттік сайлауда қайтадан кандидатурасын ұсынбайтынын мәлімдеген. Ол "Барселонаны" 2021 жылдың наурыз айынан бері басқарып келеді, бұған қоса бұл қызметті 2003–2010 жылдары да атқарған.