Әйел желіде танысқан алаяққа алданып, 77 миллион теңге аударып жіберген
Әйел әлеуметтік желіде танысқан алаяққа алданып, 77 миллион теңге аударып жіберген. Бұл туралы Stan.kz ақпарат агенттігі хабарлайды.
Фото: freepik.com
Батыс Қазақстан облыстық полиция департаментінің қызметкерлері бірнеше облыс орталығының тұрғындарына жоқ бизнеске ақша салу туралы ұсыныс жасап, олардың 200 миллион теңгеден астам қаражатын иемденген ер адамды ұстады.
Ұсталған адам Түркістан облысының 32 жастағы тұрғыны болып шықты. Ол әлеуметтік желі арқылы жәбірленуші әйелмен танысып, хат алмасу барысында оған өзін көршілес елдерге көтерме бағада ұялы телефондар сатумен айналысатын кәсіпкер деп таныстырып, сеніміне кірген.
Алаяқ әйелге бизнесіне инвестиция салуды ұсынып, жоғары табыс уәде еткен. Әйел сеніп, екі пәтерін сатудан түскен қаражатты және жинаған ақшасын алаяққа аударып жіберген. Нәтижесінде шығын 77 миллион теңгеден асты. Сонымен қатар, алаяқтың қармағына әйелдің туыстары мен таныстары да түскен, олар да “табысты" инвестицияға қызығып, оған ақша берген.
Қазіргі уақытта алаяқтықтың алты эпизоды бойынша тергеу жүргізілуде, ал жалпы шығын мөлшері шамамен 200 миллион теңгені құрады.
Еске салсақ, бұған дейін Түркістан облысында 150-ге жуық адамды алдап соққан алаяқтар сотталғаны туралы жазған едік.