Әйел ұшақта ер адамның кішкентай қызды азғындамақ болғанына куә болған
Ақтау-Алматы рейсінің жолаушысы 21 желтоқсанда кішкентай қызды ер адам азғындамақ болғанын айтты. Бұл туралы Stan.kz ақпарат агенттігі хабарлайды.
Фото: Pixabay.com
Жолаушының айтуынша, ұшақта өзі ұшып келе жатқан кәмелетке толмаған баланың қасына бір ер адам отырып алып, оған жөнсіз әрекет жасаған.
"Салонда жарық сөнген кезде ол қызды азғындамақ болды. Ер адам оның қолын алып, атын, жасын сұрап, мақтап, сипап, дем ала бастады. Бала бұған қарсы тұруға тырысты. Жарық қосылған кезде стюардессалар қыздың жылап тұрғанын көрді. Себебін анықтап, қасыма ауыстырды. Мен оны жұбаттым. Ер адам полицейлердің күтіп тұрғанын білмей, ішіп алып, қатты ұйықтапты. Артында отырған жолаушылар куәгер болуға келісті. Келген бойда қызды ата-анасы, ал ер адамды полиция күтіп алды", – деп жазды қазақстандық әйел Threads парақшасында.
Полиция басқармасының баспасөз қызметі құқықбұзушы ішкі істер органдарына жеткізіліп, алкогольдік ішімдіктерді ішкені немесе қоғамдық орындарға мас күйінде шыққаны үшін әкімшілік жауапкершілікке тартылғанын хабарлады.
Мұндай әрекет 5 АЕК (18 460 теңге) мөлшерінде айыппұлды қарастырады.
"Тергеу нәтижесінде басқа заңсыз әрекеттер анықталған жоқ", – деп хабарлады департаменттің баспасөз қызметі.