"Ауданы тым кішкентай": Ақтөбеде балалардың қажетіне берілген президент резиденциясы бүгінде бос тұр
Ақтөбе облысының әкімі Асхат Шахаров балалардың қажетіне берілген президен резиденциясы тым кішкентай болғандықтан, бүгінде бос тұрғанын мәлімдеді. Бұл туралы Stan.kz ақпарат агенттігі хабарлайды.
Видеодан скриншот
Журналистер орталық коммуникация қызметі алаңында өткен брифинг барысында президент резиденцияның бүгінгі жай-күйі жөнінде сұрап көрген еді.
“Ғимараттың ауданы тым кішкентай, 300 шаршы метр төңірегінде. Ойлана келе, ERG компаниясымен келісіп, қала орталығынан 3 қабатты ғимарат сатып алынды. Ғимарат білім басқармасының активіне берілді”, – деді ол.
Әкімнің сөзінше, бүгінде резиденция бос тұр.
“Бастапқыда балаларға берілсін деген тапсырма болған. Бірақ жаңа ғимарат алып, бұл мақсатты орындадық деп ойлаймын. Нысанға қатысты жоспар жоқ”, – деп түсіндірді аймақ басшысы.
Президент резиденциясының балалардың қажетіне берілетіні жайлы 2023 жылы айтылған еді. Нысан “ҚазХром” АҚ аумағында орналасқан. Бастапқыда әкімдік ғимаратқа тек 25 баланы орналастыру мүмкін екенін айтқан.
Айта кетейік, Ақтөбе облысының әкімі қызметке келгелі сыйақы алмағанын айтқан еді.