Атырау қаласында 23 наурыз – Тазару күніне орай кең көлемді сенбілік ұйымдастырылды. Экологиялық акция аясында Жайық өзенінің жағалауы тазартылып, қала аумағында санитарлық жұмыстар жүргізілді.
Іс-шараға Атырау облысының әкімі Серік Шапкенов қатысып, сенбілікке өзі де белсенді түрде атсалысты. Өңір басшысы тұрғындармен бірге тазалық жұмыстарына қатысып, үлгі көрсетті.
Сенбілікке мыңнан астам адам мен 50-ге жуық мекеме жұмылдырылды. Сонымен қатар тазалық жұмыстарына 4 арнайы техника тартылып, нәтижесінде 40 тоннадан астам тұрмыстық қалдық жиналды.
Атырау облыстық Табиғи ресурстар және табиғат пайдалануды реттеу басқармасының бөлім басшысы Эльмира Сыздықованың айтуынша, шараға еріктілер мен жастар белсенді қатысуда.
“Бүгінгі шараға еріктілер мен жастар қатысуда. Іс-шараның мақсаты – қоршаған ортаны қорғау, Жайық өзені жағалауын тазалау және табиғатты таза ұстауға деген жауапкершілікті арттыру. 50-ге жуық мекеме қатысып жатыр. 4 техника жұмылдырылған. Сенбілік аудан, қала орталықтарында және резерват аумағында өтуде. Наурызнама онкүндігі аясында өтіп жатқан бұл іс-шара алдағы уақытта да жалғасын табады. Жыл сайын “Таза жағалау” акциясын өткізіп келеміз”, – деді ол.
Мұндай игі бастамалардың негізгі мақсаты – табиғатты аялау, қоршаған ортаны қорғау және тұрғындардың экологиялық жауапкершілігін арттыру.
Айта кетейік, Тазару күні – Наурыз мерекесі аясындағы маңызды күндердің бірі. Бұл күні еліміздің барлық өңірлерінде экологиялық шаралар ұйымдастырылады.
