Атырау облысында кенелердің қаптауы ақбөкендер мен үй малдарына қауіп төндірді: Фермерлер дабыл қақты
Атырау облысының Құрманғазы ауданында фермерлер кенелердің көбейіп кеткеніне алаңдаулы. Шаруалардың айтуынша, әлсіреген ақбөкендерді кенелер қаптап, жеп жатыр. Енді кенелер үй малына да қауіп төндіруі мүмкін дейді фермерлер. Бұл туралы Stan.kz ақпарат агенттігі КТК телеарнасына сілтеме жасап хабарлайды.
Фото: Видеодан скрин
Ауыл тұрғындары кенелердің тарататын түрлі ауруларынан қорқып отыр. Ең бастысы, кенелер үй жануарларына, әсіресе, жылқыларға жаппай шабуылдауы мүмкін дейді.
Қазір малдар төлдеп жатқандықтан вакцина егу мүмкін емес. Сондықтан тұрғындар әзірге қора-қопсыны дезинфекциялаумен шектеліп отыр. Бірақ бұл шараның көмегі боларына күмәнмен қарайды.
Оқиға орнына ветеринарлар мен жануарлар дүниесін қорғау инспекторлары барып, жағдайды тексерді. Ветериналар үй малына қауіп жоқ екенін айтып, халықты тыныштандыруға тырысты.
Құрманғазы ауданы әкімдігі Суындық ауылы маңынан шамамен 10 ақбөкеннің өлексесі табылғанын мәлімдеді.
"Бірақ олардың өлуіне кенелер себеп болған жоқ. Ауданда жұқпалы аурулар немесе эпидемия тіркелген жоқ. Барлық өлекселер жиналып, жойылады", – деді ауыл әкімдігі.
Еске салайық, бұған дейін Ақтауда тұрғындар тағы да демалыс базасының маңынан итбалықтар мен құстардың өлекселері табылғанын айтқан еді. Айтуларынша, бұл өлекселер былтыр күзден бері осы аумақта жатқан.