Астанадағы мүмкіндігі шектеулі балалар қоғамы заманауи жабдыққа ие болды

Allur қазақстандық автокөлік компаниясы Астанадағы "Мүгедек балалар қоғамы" қоғамдық бірлестігіне қайырымдылық көмек көрсетіп, балалардың дамуы мен оңалтуына арналған заманауи сенсорлық жабдықтарды табыстады. 

Игі бастама аясында ұйымға сенсорлық үстел мен сенсорлық үй табысталды. Бұл – ерекше қажеттіліктері бар балалардың когнитивтік, моторлық және коммуникативтік дағдыларын дамытуға бағытталған арнайы интерактивті кешендер. Аталған жабдық күнделікті сабақтар мен түзету-дамыту бағдарламалары барысында пайдаланылатын болады.

"Сенсорлық жабдықтар сабақтарды когнитивтік, сөйлеу және моторлық дағдыларды қатар дамытатын форматта ұйымдастыруға мүмкіндік беріп, балалардың әлеуметтік бейімделуіне ықпал етеді. Мұндай технологияларды күнделікті жұмысымызға енгізу даму бағдарламаларын ұзақ мерзімді жоспарлауға және серіктестермен жүйелі өзара іс-қимыл орнатуға жол ашады. Балалардың нақты қажеттіліктеріне бағытталған бастамаларды қолдауға дайын болғаны және бағдарламаларымызды дамытуға қосқан үлесі үшін Allur компаниясына алғысымызды білдіреміз", – деді қоғамдық бірлестік өкілі.

Allur компаниясында Жаңа жыл кезеңі қолдауға және қамқорлыққа ерекше назар аударылатын уақыт ретінде қарастырылады. Бұл ең алдымен көмекке мұқтаж жандарға бағытталған бастамалар арқылы көрініс табады. Осындай бастамалар компанияның корпоративтік әлеуметтік жауапкершілігінің және инклюзивті қоғамды дамытуға қосқан үлесінің бір бөлігі болып табылады. "Тілек шыршасы" акциясы аясында компания қызметкерлері аталған мекемеге баратын балалардың Жаңа жылдық тілектеріне үн қатып, қажетті жабдықтарды сатып алумен қатар, шамамен 100 баланың жаңа жылдық арманын орындауға атсалысты.

"Бизнес үшін қоғам алдындағы жауапкершілік нақты іспен көрінуі керек. Ерекше қажеттіліктері бар балаларға қолайлы орта қалыптастыру – осы жауапкершіліктің маңызды бөлігі. Біз табысталған технологиялар балалардың даму және оңалту процесінде тиімді құралға айналатынына үміт артамыз. Әрбір баланың өз әлеуетіне сеніп, заманауи мүмкіндіктерді еркін пайдалануына жағдай жасау – біздің ортақ мақсатымыз", – деп атап өтті Allur зауытының атқарушы директоры Аргулан Майконов.

Қоғамдық бірлестік көрсетілген көмек үшін Allur компаниясына алғыс білдіріп, жаңа жабдықтардың балалармен жұмыс істеу мүмкіндіктерін едәуір кеңейтіп, өткізілетін сабақтардың сапасын арттыратынын атап өтті.