Астанада Bi Group басшысына тиесілі балабақшада тәрбиешісі балаларға күш көрсеткен (видео)
Фото: Видеодан скриншот
Желіде Bi Group компаниясына тиесілі жаңа жекеменшік балабақша тәрбиешісінің балаларды жұлқылап жатқан сәтінен видео жарияланды. Компания өкілдері тәрбиеші жұмыстан босатылғанын мәлімдеді. Бұл туралы Stan.kz ақпарат агенттігі хабарлайды.
Ата-аналар Астанадағы олигарх Айдын Рахымбаевтың компаниясына тиесілі Aldi BI жеке балабақшасына шағымдануда. Олардың айтуынша, балабақшада балаларға күш қолдану фактілері жиілеген.
Тәрбиешінің балаларды жұлқылап жатқаны бейнебақылау камерасына түсіп қалған.
Компания өкілдері бұл жайтты растады.
"Тәрбиеші балаларға қатысты жол беруге болмайтын әрекетке барды. Біз мұны кәсіби этика мен мінез-құлық стандарттарын өрескел бұзу деп санаймыз. Қызметкер тиісті бап бойынша бірден жұмыстан шығарылды", – деп мәлімдеді компания өкілдері.
Bi Group компаниясында осы жайт бойынша қызметтік тексеру жүргізіліп жатқаны мәлім болды.
"Біз балабақшамыздағы қауіпсіздік пен ашықтықты жақсарту үшін бар күш-жігерімізді салып жатырмыз – болашақта мұндай жағдайларды мүлдем болдырмау үшін ішкі бақылау жүйесін күшейту жұмыстары басталды. Біз болған оқиғаға шын жүректен өкінеміз және ата-аналарға сенімдері мен алаңдаушылықтары үшін алғыс айтамыз", – дейді олар.
Еске салсақ, бұған дейін Астанадағы №21 "Гүлдер" балабақшасында тәрбиеші көмекшісінің тарапынан балаларға қатысты зорлық-зомбылықтың 19 дерегі тіркелгенін жазған едік. Бұл дерек бойынша қылмыстық іс қозғалып, тергеу жүргізіліп жатыр.
"Мүгедектер мен аурулар саны артып келеді": Бір аптадан бері түтінге тұншығып отырған атыраулықтар дабыл қақты
