Астанада өнеркәсіптік альпинист тоғызыншы қабаттан құлап кетті
Астанада өнеркәсіптік альпинист салынып жатқан тұрғын үй кешенінің шатырынан құлап кетті. Полиция департаменті оқиғаның мән-жайына қатысты түсініктеме берді. Бұл туралы Stan.kz ақпарат агенттігі хабарлайды.
Оқиға дүйсенбі, 9 ақпанда Бұқар жырау көшесінде болған. Зардап шеккен азамат – 1997 жылы туған ер адам, ол ауруханаға жеткізілді.
Астана қаласы Полиция департаментінің мәліметінше, құрылыс жұмыстарын жүргізу кезінде қауіпсіздік талаптарын бұзу фактісі бойынша қылмыстық іс қозғалған.
“Алдын ала мәлімет бойынша, жұмысшы 9-қабат деңгейінде тепе-теңдігін жоғалтқан, ал төмен түсуге дайындық сәтінде сақтандыру жүйесі бекітілмеген болуы мүмкін. Қазіргі уақытта 28 жастағы ер адам ауруханаға жатқызылды, оған қажетті медициналық көмек көрсетіліп жатыр”, – деп хабарлады полиция.
Оқиғаның мән-жайы анықталып жатыр.
Ал BI құрылыс компаниясының баспасөз қызметінің ақпаратына сәйкес, альпинистің шамамен сағат 16:00-де терезе жуу кезінде құлаған.
“Зардап шеккен адамға ота жасалды, ол есін жиды. Еңбек инспекциясының қатысуымен тексеріс жүргізіліп жатыр”, – деп мәлімдеді компания.
Айта кетейік, бұған дейін астаналық тұрғын өнеркәсіптік альпиниске қоқан-лоқы көрсеткені хабарланған еді.
"5 жыл бойы жөндеу жасаған ғимаратымды тартып алды": Кәсіпкер Алматы облысы әкімдігінің бассыздығына шағымданды
