Астанада мемлекеттік компаниялардың жұмыс кестесі өзгереді

Фото: Астана әкімдігі

Астанада 15 қыркүйектен бастап коммуналдық кәсіпорындар мен мемлекеттік компаниялардың жұмыс күні басталатын уақыты өзгереді. Бұл шара жол қозғалысын жеңілдету үшін қабылданбақ. Бұл туралы Stan.kz ақпарат агенттігі хабарлайды. 

Әкімдіктің мәлімеінше, тек мемлекеттік және квазимемлекеттік ұйымдардың жұмыс кестесі өзгереді. 

“15 қыркүйектен бастап енгізілетін жаңа жұмыс кестесі негізінен қаланың орталық аудандарында орналасқан мемлекеттік және квазимемлекеттік ұйымдарға қатысты. Мектептер, медициналық мекемелер және халыққа қызмет көрсету орталықтары секілді әлеуметтік нысандар бұрынғы режим бойынша жұмысын жалғастырады. Бұл шаралар таңғы уақытта көлік ағынын біркелкі етуге және қаладағы көлік көп жүретін тас жолдардағы қозғалыс тығыздығын азайтпақ”, – делінген әкімдік хабарламасында.

Сонымен қатар көлікті тыйым салынған жерлерге қою және қою ережелерді бұзу деректеріне қатысты бақылау күшейтілмек. Ережені өрескел бұзған көліктер арнайы айып тұрағына қойылады.

Алдын ала есептеулер бойынша, қолға алынған шаралар таңғы және кешкі уақытта көлік жүктемесін 15–20 пайызға дейін төмендетуге мүмкіндік береді.

Мамандардың айтуынша, бұл бастама экологиялық жағдайға оң әсер етіп, қалалық мобильділік сапасын арттырады.

“ҚазірАстананың әртүрлі аудандарындағы көлік ағымдарына кешенді талдау жүргізіліп жатыр.Тек жұмыс күні басталу уақытын өзгерту ғана емес, жекелеген ұйымдар үшін түскі үзіліс немесе жұмыс күнінің аяқталу уақытын өзгерту сынды басқа да шаралар қарастырылып жатыр”, – деп толықтырды әкімдіктегілер.

Бұған дейін депутаттар Алматыдағы кептеліс мәселесін шешу үшін қызметкерлерге қашықтан жұмыс істеп, студенттерге сабақты ерте бастауды ұсынған еді.