Бұл туралы Әйгерім Астанада өткен «Туған жер! Туған тіл! Туған ел!» Қазақстан патриоттары форумында мәлімдеді. Еске сала кетсек, Әйгерім маусым айында өткен Дүниежүзі қазақтарының V құрылтайына қатысқан болатын. Құрылтайда Президент Нұрсұлтан Назарбаев Әйгерімге елге оралып, Отанымызда қызмет етуге ұсыныс жасаған еді.

«Қазақстан Тәуелсіздігін алғаш рет жер-жаһанға жариялағанда, бөркін аспанға лақтырып қуанған шетелдегі қазақ жастарының бірі мен едім. Шетелде туып-өссем де, кішкентайымнан Ер Төстік, Қобыланды батыр, Еңлік-Кебек, Қозы Көпеш пен Баян Сұлу, ертегілер мен жырларын тыңдап, қазақы қасиеттерді бойыма сіңіріп өстім. Есейе келе ана тілімде ұлы Абай, С.Мұқанов, М.Әуезовтің шығармаларымен сусындадым. Қазір Италияның Милан қаласындағы Боккони университетінің оқытушысы, Сингапур мемлекеттік университетінің Ли Куан Ю атындағы мемлекеттік саясат мектебінің кеңесшісі болып қатар қызмет атқарудамын», – деді Әйгерім. Өз сөзінде Әйгерім жастарды патриоттық сезімде тәрбиелеудің ел дамуында аса маңызды орын алатынын атап өтті. «Кез келген мемлекет дамуының негізгі себептері оның азаматтарының патриоттық ниетімен тікелей байланысты. Неге десеңіз, ел азаматтары әр салада жауапкершілікпен қызмет етіп, шын ниетімен іске кіріскенде ғана нақты нәтижелерге қол жеткізе алады», – деді ол.

Сонымен бірге, Әйгерім Елбасы Нұрсұлтан Назарбаевтың шақыртуымен жақын арада Қазақстанға оралатынын хабарлады. «Өзге елде сұлтан болғанша, өз еліңде ұлтан бол» деген аталы сөз бар. Дүниежүзі қазақтарының V құрылтайында Елбасы маған елге оралып, Отанымызға қызмет етуге ұсыныс жасаған еді. Содан бері көп ойланып, шетелдік оқу орындарында жинақтаған тәжірибемді елге әкеліп, Қазақстанның келешек көшбасшыларын тәрбиелеуді ұйғардым», – деді Әйгерім Болатқызы.

Әйгерім қазақ, орыс, ағылшын, моңғол, чех, итальян тілдерінде еркін сөйлейді. Ол Қазақстан мен Сингапур арасында білім саласы бойынша бірнеше келісім жасасуға тікелей атсалысып, Қазақстанның 150-дей мемлекеттік қызметкерлері, министрлері мен басқа да лауазымды қызметкерлерінің өз білімдерін жетілдіруіне жағдай жасаған. Әйгерімнің көмегімен 2012 жылы Назарбаев университеті мен Ли Куан Ю атындағы мемлекеттік саясат мектебі арасында 5 жылдық келісімшарт бекітілді. Сондай-ақ, Әйгерім Боккони университеті мен Қазақстанның Мемлекеттік басқару академиясы арасында стратегиялық серіктестік орнатуға үлес қосқан.

Тағы да оқыңыз:

“АрселорМиттал Теміртау” ереуілге шыққан шахтерлерді сотқа берді

Бауыржан Момышұлы: Мен де екі жыл жер тепкілеп, ефрейтордан таяқ жеген солдаттың бірі болдым

Жас жігіт бал ашып отырған әйелдің құмалағын теуіп, ұрсып тастады (видео)

Талқылау