Соңғы жаңалықтар
Соңғы жаңалықтар

Қазақстандық жігіт сотты ChatGPT көмегімен жеңіп шықты

Алматының 23 жастағы тұрғыны Кенжебек Исмаилов желідегі парақшасында жол жүру ережесін бұзғаны үшін салынған айыппұлдың күшін жоюға ChatGPT көмегімен қол жеткізгенін жазды. Бұл туралы Stan.kz ақпарат агенттігі хабарлайды.

Фото: Видеодан скрин

Өткен жылдың желтоқсан айында Исмаилов жол ережесін бұзғаны үшін 5800 теңге көлемінде (жеңілдікпен) айыппұл алған және оны төлеген. Алайда бейнебақылау жазбаларын зерттеген соң, оның айыппұлдың заңдылығына күмәні туындаған.

"Сотта ChatGPT көмегімен жеңіске жеттім. Желтоқсан айында маған заңсыз айыппұл салынды. Оны 5800 теңге шамасында жеңілдікпен төледім Бірақ qamqorgov сайтынан бейнежазбаны алғаннан кейін Алматы полиция департаментіне шағым түсірдім. Алайда олар шағымымды қабылдамады", – деп жазды Кенжебек Исмаилов.

Полицияға жасалған шағым қанағаттандырылмады. Бірақ Исмаилов берілмей, сотқа арыз түсірді. Ол сотқа арыз беру және басқа да құжаттарды әзірлеу үшін ChatGPT қызметін пайдаланды, бұл оған жеңіске жетуге көмектесті.

Нәтижесінде сот Исмаиловтың пайдасына шешім шығарып, айыппұлды жойды. Енді жеңіске жеткен соң, Кенжебек азаматтық сотқа жүгініп, өтемақы талап етпек. Дегенмен ол өз күресінің басты мақсаты ақша емес, азаматтық құқықтарын қорғау екенін атап өтті.



Еске салайық, бұған дейін желтоқсан айынан бастап, орташа жылдамдықты асырғаны үшін айыппұл салынатынын жазған едік. Қазақстанда 2025 жылдың алғашқы екі айында Әкімшілік құқық бұзушылық туралы кодексінің 599-бабы бойынша, яғни тыйым салынған бағдаршам сигналына өту бойынша 106 мың құқықбұзушылық тіркелген. Бұл 2024 жылдың дәл осы кезеңімен салыстырғанда алты есе көп.

Талқылау