Алматыда мектептен ақша жымқырған бухгалтер 7 жылға сотталды
Алматыда мектептен ақша жымқырған бухгалтер 7 жылға сотталды. Бұл туралы Stan.kz ақпарат агенттігі хабарлайды.
Фото: pixabay.com
Алматы қаласы Медеу ауданының №2 аудандық соты сенiп тапсырылған бөтен мүлiктi иемденiп алу немесе талан-таражға салу бойынша мектеп бухгалтеріне қатысты қылмыстық істі қарады.
2019-2023 жылдар аралығында Алматы қаласындағы гимназиялардың бірінің бас есепшісі оқу орнының банктік шоттарына қол жеткізе отырып "Интернет-банкинг" электронды жүйесі арқылы өзінің жеке шотына, сондай-ақ, басқа тұлғаның шоттарына ақшалай қаражатты негізсіз аударып отырған.
Келтірілген материалдық шығынның жалпы сомасы – 23 миллион теңге.
Сотта сотталушы Н өз кінәсін толық мойындап, оған бас бостандығынан айырмайтын жаза тағайындауды сұрады. Прокурор сотталушыны 7 жыл 6 айға бас бостандығынан айыруды сұрады.
"Сот сотталушы Н-ны кінәлі деп танып, өз кінәсін мойындауының, куәгерлердің айғақтарының, маманның қорытындысының негізінде оны 7 жылға бас бостандығынан айырды. Жаза тағайындау кезінде сот Н-ға жауапкершілікті жеңілдететін мән-жайлар ретінде: жасаған қылмысына өкінуін, материалдық залалды жартылай түрде өтегендігін, жас баласының болуын ескерді. Іс бойынша жазаны ауырлататын мән-жайлар анықталмады", – делінген қалалық соттың хабарламасында.
Үкім заңды күшіне енген жоқ.
Еске салсақ, осыған дейін Алматы қалалық емханасының бухгалтерлері 341 миллион теңге жымқырғанын жазғанбыз.