Алматыда 13 адамның өмірін жалмаған өртке дабыл жүйесін қалпына келтірген адам айыпты болмақ
Алматыда 13 адамның өмірін қиған хостелдегі өрт бойынша резонанстық іс аясында кінәлі ретінде кәсіпкер Александр Пекельник болуы мүмкін. Ол сол ғимаратта өрт туралы сигнализацияны қалпына келтірген. Алайда оның туыстарының айтуынша, ер адам сигнализацияны ғимаратты хостелге айналдырылғанға дейін жөндеп қойған. Бұл туралы Stan.kz ақпарат агенттігі Кaztag.kz порталына сілтеме жасап хабарлайды.
Фото: Stan.kz
"Құрметті Қасым-Жомарт Кемелұлы, сізге, Қазақстан азаматтарының конституциялық құқықтарының кепілі ретінде, Алматы тұрғыны Александр Пекельниктің жұбайы Анастасия жүгініп отыр. Бұл өтінішті осындай форматта жасауға мәжбүрмін, себебі мәселенің маңыздылығы басқа жол қалдырмайды. Сізден осы жағдайға назар аударып, әділдіктің орнауына ықпал етуіңізді сұраймын. Белгілі болғандай, өткен жылдың күзінде Алматыдағы хостелде болған өрттің салдарынан 13 адам қаза тапты. Бұл – қайғылы оқиға. Біз сол адамдардың отбасыларына шын жүректен көңіл айтамыз. Алайда бұл трагедия менің отбасымды да айналып өтпеді. Бірақ мүлдем басқа қырынан. Бүгінде менің күйеуімді кінәлі етіп көрсетуге тырысып жатыр. Оқиға болардан бір жыл бұрын күйеуімнің компаниясы А.Ш.86 мекенжайындағы бос тұрған ғимаратта өрт дабылын қалпына келтірумен айналысқан, кейін сол жерде заңсыз хостел ашылды", – деп Пекельник президент Тоқаевқа жүгінді.
Ол тергеудің басынан-ақ күйеуінің іске куәгер ретінде қатысқанын түсіндірді.
"Ол өрт шыққанға дейін бұл хостелдің бар екенін білмегенімен, тергеуге барынша көмек көрсетті. Алайда, маусымның соңында ешқандай заңды дәлелдер мен негіздерсіз күйеуімнің куәгер ретіндегі мәртебесі күдіктіге ауыстырылды. Оны өрт қауіпсіздігі талаптарын бұзды деп айыптап отыр, алайда заң бойынша бұл үшін тікелей жауапты – хостелдің иесі, яғни директоры. Күйеуім оның өзімен де, хостелмен де байланысқа шықпаған, ешқандай қызмет көрсетпеген, тіпті таныс та болмаған. Тергеу бұл дабыл жүйесінің хостелге сәйкес келмеуін алға тартып отыр. Заң бойынша, ғимаратта қайта жоспарлау жүргізілгеннен кейін, бұрынғы өрт дабылы жүйесі жарамсыз болып, оны қолдануға тыйым салынады, өйткені өрт дабылы ғимараттың функционалдық мақсатына сәйкес орнатылады. Ал күйеуімнің компаниясы жұмыс істеген кезде бұл мекенжайдағы ғимарат бос тұрған, ешқандай функционал болмаған", – деді әйел.
Әйелдің айтуынша, тергеу оның күйеуінің бұл іске қатысы жоқтығын көрсететін барлық дәлелдерге көз жұма қарайды.
"Біздің барлық өтініштеріміз бен шағымдарымызға теріс жауап алдық. Іс сотқа жіберілді. Құрметті Қасым-Жомарт Кемелұлы, біздің қиын жағдайымызға бейжай қарамауыңызды сұраймын. Менің күйеуім – заңға бағынатын азамат, ол адал түрде өз ісін жүргізеді. Ол – парасатты адам, тамаша әке және отбасы адамы", – деді әйел.
Оның айтуынша, тергеу күйеуінің бұл іске қатысы жоқтығы туралы барлық дәлелдерге көз жұма қараған.
"Халыққа арналған жолдауыңызда біздің қоғамда заң мен тәртіп орнатуға тиіс екенін айттыңыз. Бұл – қоғамдық және жеке қауіпсіздікті қамтамасыз етудің негізгі шарттары. Бізге әділеттілікке қол жеткізуге көмектесіңіз, адамдардың қаза табуына шын мәнінде кінәлілер жауапқа тартылсын. Біз адал және әділ Қазақстанда өмір сүргіміз келеді", – деп қорытындылады Пекельник.
Еске салайық, бұған дейін Алматыдағы Шәріпов көшесінде орналасқан хостелде өрт шығып, 13 адамның қаза тапқаны туралы жазған болатынбыз. Қаза тапқандардың ішінде 4 шетел азаматы да бар. Кейіннен президент Тоқаев қаза тапқандардың жақындарына көңіл айтты, ал Алматы әкімдігі өрттен қаза тапқан қазақстандықтардың отбасыларына 1 миллион теңгеден берілетінін мәлімдеді.