Интернет-алаяқтар пайдаланады: Алматыдағы жалдамалы пәтерге қылмыстық телефон станциясы орнатылған
Алматыда полицейлер интернет-алаяқтық жасады деген күдікпен екі ер адамды ұстады. Бұл туралы Stan.kz ақпарат агенттігі хабарлайды.
Фото: polisia.kz
Полицияның мәліметінше, Алматыдағы жалдамалы пәтерлердің бірінде sim-box құрылғысымен жұмыс істеп келген 25 жастағы екі жігіт ұсталған. Sim-box құрылғыларын интернет-алаяқтар ел аумағында түрлі мессенджерлер арқылы қазақстандықтарға қоңырау шалу үшін пайдаланады.
"Адамдарды алдау үшін қылмыскерлердің белгілі бір елде болуы міндетті емес. Sim-box құрылғыларының болуы жеткілікті. Олар жергілікті ұялы байланыс операторларының интернет–трафигін қолдана отырып, жалған нөмірлермен байланыс орнатуға мүмкіндік береді”, – делінген полиция хабарламасында.
Жедел уәкілдер пәтерді тінту кезінде әрқайсысы 32 слоттық төрт sim-box құрылғысын және қазақстандық ұялы байланыс операторларының 190 sim-картасын, бірнеше телефон мен ноутбуктарды тәркіледі.
Тергеу амалдары жүргізілуде.
Еске салсақ, бұған дейін Қазақстанда алаяқтар мобильді операторлар арқылы алдауға көшкені туралы жазған едік.
"Балам әкесінің дертін "мұра" етіп алды": Қазақстандық шизофрениямен ауыратынын 16 жыл бойы әйелінен жасырып келген
