“Өткен жылы жат діни ағымның жетегінде кеткен біреулер "Домбыра харам" деп, қазақтың ең құнды музыкалық аспабын іске алғысыз еткісі келсе, тағы бір елірген тобыр басына сәукеле киіп, көшпенді халықтық ғасырлар бойғы баспанасы – киіз үй ішінде жартылай жалаңаштанып, жынойнақ бимен ұлттың ашуын туғызған еді. Енді міне, ең сорақысы – мемлекетіміздің басты рәміздерінің бірі – Көк туымызды қорлаушылар бой көрсетті. Жуырда ғана Атырауда болған оғаш оқиға қоғамда үлкен резонанс туғызып, азаматтардың ашу-ызасын тудырып отыр. Бет-ауызын тұмшалап, қара жамылған төрт әйел мұз айдынында өткен спорттық жарыс кезінде Қазақстан Республикасының мемлекеттік туын ұстап түскен сурет әлеуметтік желілерге кеңінен тарап кетті. Олардың қолындағы мемлекеттік тудың бетіне араб жазуы мен араби қылыштың сұлба-суреті салынған”, – деді ол.

Ермұрат Бәпидің сөзінше, мұнда назар аударатын жайт – көк тудағы араб қарпіндегі жазудың өте сапалы түрде, арнайы баспа құралымен таңбалануы.

“Демек бұл жай ғана тұрмыстық бұзақылық, әдепсіз шектен шығушылық емес. Бұл – біздің қоғамымызға, мемлекеттігімізге, ұлттық дәстүріміз бен бірегейлігімізге жасалған ашық және нақақ қарсылық. Ту – әрбір қазақстандық үшін қасиетті құндылық. Бұл мемлекеттің тәуелсіздігі мен тұтастығының қастерлі символ белгісі. Оны бөтен белгілермен, әлдебір жат мазмұндағы жазулармен бүлдіру – заңға өрескел қайшы және қылмыстық жауапкершілікке тартуды талап ететін әрекет. Мемлекеттік туды қорлау – бүкіл халықты, тұтас мемлекетті қорлау! Сондықтан мұндай заң бұзушылық қатаң әрі мүлтіксіз жазалануға тиіс. Бірақ ескере кететін бір жәйт – елдің туын бүлдіру арқылы жат пиғылды дәріптемек болған бұл төрт қыз әлдебір арандатушы топтың құрбаны болуы мүмкін. Олар жастық алаңғасарлықпен, әлде материалдық қызығушылықпен немесе діни сауатсыздықпен жасаған бұл өрескел заң бұзушылықтың тасасында тұрған әлдебір кереғар күштер бар сияқты”, – деп қосты депутат.

Мәжілісмен әкімшілік тұрғыдағы жазасын алған төрт қыздан бұрын, осы қылмысты әрекетті ұйымдастырушылар жазаға тартылуға тиіс екенін мәлімдеді. Қылмыстық кодекстің 372-бабында "Қазақстан Республикасының мемлекеттік рәміздерін қорлау үш мың айлық есептiк көрсеткiшке дейінгі мөлшерде айыппұл салуға не сол мөлшерде түзеу жұмыстарына не тоғыз жүз сағатқа дейінгі мерзімге қоғамдық жұмыстарға тартуға не екі жылға дейiнгi мерзiмге бас бостандығын шектеуге не сол мерзiмге бас бостандығынан айыруға жазаланатыны" көзделген.

“Тағы бір алаңдаушылық тудыратын жағдай – осындай түр-түсі бұрмаланған Қазақстан туы Wildberries Rus маркетплейсінде 5000 теңгеден еркін және ашық саудада сатылып жатыр. Бұл не сұмдық?! Бұған кім жол беріп отыр? Сөз жоқ, ел Конституциясы бойынша, біз зайырлы мемлекетпіз, онда дін мемлекеттік саясаттан тыс деп жазылған. Қазақстан – әрбір азаматтың діни сенім бостандығы сақталған ел. Бірақ біздің ұлттық құндылықтарымыз, халық бірлігі мен мәдени мұрамыз заңмен қорғалады. Дегенмен әлдебір теріс ағымдық іс-әрекеттер біздің ұйысқан бірлігімізге қол сұқса, біз мұндай мәселені мемлекеттік саясаттан ажыратып қарай алмаймыз! Сондықтан қоғамда заңды түрде алаңдаушылық тудырған бұл бассыздыққа тиісті баға берілуі керек. Бұл – жеке біреулердің діни көзқарасын білдіруі емес, қоғам тұрақтылығын, мемлекеттік тұтастықты бұзуға бағытталған нақақтан-нақақ жасалған арандату. Бұны ежелден қалыптасқан діни бірлік пен қоғамға жарқышақ салудың қаскөй әрекеті деп бағалау керек!” – деп мәлімдеді ол.

Сонымен қатар Ермұрат Бәпи бұл оқиғаның арандатушылық мазмұны мен мемлекеттік тудың бетінде қолданылған символиканың сипаты – оның алдын ала жоспарланғанын, әлдебір топтың нақақ ұйымдастырғанын көрсетеді дейді.

“Бұған кім тапсырыс берді? Ұйымдастырушылардың мақсаты қандай? Бұл сұрақтарға құқық қорғау органдары нақты жауап беруге тиіс! Мұндай арандатушылықтың қайталануына жол бермеу үшін тергеу-тексеру шарасы жан-жақты жүргізілуі қажет. Жуырда өткен Ұлттық Құрылтайда Мемлекет басшысы Қасым-Жомарт Тоқаев ұлттық дәстүрлерімізді дәріптеуге шақырып, қазақы киім біздің ұлттық болмысымызды айқындап, халқымыздың қайталанбас келбетін көрсететінін ерекше атап өтті. Ал біз не көріп отырмыз? Осы ұлттық бірегейлікті дәріптеуге қарсылық білдіру белгісі ғана емес, бұл – қоғамға қарсы бағытталған ашық арандатушылық. Бұл – халқымызға жат нормаларды күштеп таңу, тарихымызды, мәдениетімізді, ұлттық мақтанышымызды жоққа шығару әрекеті”, – деді мәжілісмен.

Өз сауалында депутат аталған жағдайды ескере отырып, жауапты мекемелер келесі шараларды шұғыл қолға алуды ұсынды:

Қолданыстағы заңнамаға сәйкес, құқық қорғау органдары болған жағдайды жіті тексеріп, арандатушылыққа алданған төрт әйелдің артында тұрған күштерді, жалған туды дайындаушыларды, оны таратушыларды анықтап, мұндай қастандықтың жолын кесу үшін, ұйымдастырушыларға қатаң жаза қолдануға тиіс;
Бекітілген стандартқа сәйкес келмейтін, ресми сипаты бұрмаланған мемлекеттік рәмізді сатуға шығарған сауда орындарының басшылығын жауапқа тарту керек. Сатылып кеткен туларды жинап алып, жою қажет. Сондай-ақ тиісті заңнамаға мемлекеттілігімізді мансұқтайтын, қоғамды жікке бөлуді көздейтін тауарлар сатқан жекелеген маркетплейстерге қарсы санкция салуды көздейтін түзетулер әзірлеп, оны заң нормасына енгізу керек;
Мемлекет радикалды ағымдардың өрескел әрекеттеріне бақылауды күшейтіп, діни құндылықтарды бұрмалауға қарсы шараларды қатаңдату қажет. Ұлттық бірегейлікті қорғаудың жүйелі және жалпыға ортақ саясатын қалыптастыратын уақыт жетті;
Зайырлы білім беру жүйесін нығайтуды, орта мектептердегі дінтану сабақтарын ұлттық мұралар негізінде жүргізу бағдарламасы дайындалуы керек. Сонымен қатар тиісті уәкілетті мемлекеттік органдар ұлттық мәдениетті дамыту, дәстүрлі киім кию бастамаларын қолдау және жастар арасында кең көлемде түсіндіру жұмыстарын жүргізуі қажет.

Еске салайық, бұған дейін Атырауда Атырау сотында мемлекеттік Туды қорлаған тағы бір жасөспірімнің ісі қаралғаны туралы хабарлаған едік. Атырауда 4 адам өзге тілде жазуы бар мемлекеттік Тумен фотоға түсіп, әлеуметтік желіде таратқан. Құқық бұзушылардың 2-еуі – кәмелетке толмаған жасөспірім.

Талқылау