Ақтөбеде 9 жастағы қыз ойын алаңында ауыр жарақат алды

Фото: Instagram/aqtobe_sergek

Ақтөбеде 7 мамыр күні “Family Park” балалар демалыс орталығында 9 жастағы қыз ауыр жарақат алды. Ойын алаңындағы көтерме иірме қыздың қолын кесіп тастаған. Бүлдіршіннің анасы саябақта қауіпсіздік шаралары сақталмағанын айтып, наразылық білдірді. Бұл туралы Stan.kz ақпарат агенттігі хабарлайды.

Зардап шеккен қыздың анасының айтуынша, баланы ашық тұрған көтергіш иірме тартып әкеткен. Ол иірімнің қоршалмағанын атап өтті. Ауыр жарақат алған бала шамамен бір литр қан жоғалтып, қолының саусақтары жансызданып қалған.

“Алда ұзақ әрі қиын оңалту кезеңі күтіп тұр. Қазір Айым тұйықталып қалған, өзіне деген сенімділігін жоғалтты. Ең сорақысы – осы оқиғадан бері парк әкімшілігінен ешкім хабарласпады, кешірім де сұрамады. Тіпті баланың жағдайын да сұрамады. Парк ішінде қауіпсіздікке жауапты адамдар жоқ, ал иелері қымбат адвокаттар жалдап, кәсібін жалғастырып отыр. Ешқандай жанашырлық та, жауапкершілік те жоқ, тек немқұрайлық. Мақсаты – пайда табу”, – деп қыздың анасы жанайқайын жеткізді.

Ақтөбе қалалық полиция департаментінің баспасөз қызметі оқиғаның болғанын растады және қазір “қауіпсіздік талаптарына сай келмейтін қызмет көрсету” бабы бойынша сотқа дейінгі тергеу жүргізіліп жатқанын хабарлады.

“Бірқатар сараптамалар тағайындалды, олардың нәтижелері бойынша заңды процестік шешім қабылданады”, – делінген хабарламада.

Сондай-ақ әлеуметтік желіде қыздың анасы орталық иесінен 8 миллион теңге талап етіп отырғаны туралы ақпарат тарады. Бұл ақпараттың рас-өтірігіне көз жеткізу үшін “Family Park” демалыс орталығынан оқыс жағдайға түсініктеме беруін сұрадық. Алайда орталық қызметкері қазір мәселені шешу жөнінде жұмыстар жүргізіліп жатқанын және алдағы уақытта орталық ресми мәлімдеме жасайтынын айтты.