Ақтөбедегі №2 қалалық сот әкімдік қызметкеріне қатысты Қылмыстық кодекстің 190 бабының 3-бөлігі 2 тармағымен (Алаяқтық) қылмыстық істі қарады. Қала әкімдігі аппаратының экс-басшысы Нұрсұлтан Исембайұлы мемлекеттiк функцияларды орындауға уәкiлеттiк берілген адам бола тұра алаяқтық жасады деп айыпталды.

Іс материалдарына сәйкес, тұрғын коммерциялық құрылысқа жер телімін алу үшін әкімдік қызметкеріне өтініш айтқан. Уәкілетті органда лауазымды тұлға болып істейтін О. көмек бергісі келген. Ол ойын айыпталушы Исембайұлына жеткізіп, жер телімін алып беру туралы өтініш жеткізген. Бұл өтінішті орындау үшін сотталушы И., О-дан 3 миллион теңге талап етті делінген. Ақша сотталушыға қызметтік кабинетінде табысталған.

Сотталушы Исембайұлы тағылған айып бойынша өз кінәсін мойындаған жоқ. Соттан өзін ақтауды сұрады.

Ал прокурор әкімдік қызметкерін “Алаяқтық” бабымен кінәлі деп тануды, өмір бойы мемлекеттік қызмет атқару құқынан айырып, 5 жыл мерзімге соттауды сұрады.

Бірақ сот Нұрсұлтан Исембайұлын кінәсіз деп таныды. Қылмыс жасауға қатысқаны дәлелденбегені үшін ақталып шықты. Айыпталушы өзіне қатысты заңсыз әрекеттер үшін келтірілген зиянды өтеу үшін арыздана алады.

Сот Қылмыстық-процестік кодекстің 394-бабының 4-бөлігіне (Ақтау үкімі) сәйкес қылмыстық іске басқа тұлғаны жауапқа тарту қажет екенін айтты. Бұл мәселені шешу үшін прокурорға жіберу туралы шешім қабылданды.

Айта кетейік, Нұрсұлтан Исембайұлы 2019 жылы Әдеп кеңесіне шақырылған. Хромтау ауданы әкімдігінде қызмет еткен кезде жер телімін заңсыз бөлу бойынша жауаптылардың бірі болды. Бірақ ол аудандық жер телімін жалға беру комиссиясының төрағасы бола тұра, мүлде құжатқа қол қоймаған. Сәйкесінше, жазаға тартылмады.

Талқылау