"Ақтөбе" хоккей клубы жабылады
Хоккейден Қазақстан біріншілігінде өнер көрсететін "Ақтөбе" хоккей клубы келесі маусымнан бастап өз жұмысын тоқтатады. Бұл туралы Stan.kz ақпарат агенттігі Shaiba.kz сайтына сілтеме жасап хабарлайды.
Фото: hfaktobe.kz
Бұл туралы Ақтөбе облысының дене шынықтыру және спорт басқармасы хабарлады.
"2024 жылдың 12 желтоқсанында өткен Ақтөбе облысы маслихатының сессиясының № 187 "2025-2027 жылдарға арналған облыстық бюджет туралы" шешімімен 2025 жылға арналған бюджет бекітілді. Оның ішінде Ақтөбе облысы атынан ерлер хоккей командасының 2024-2025 жылдардағы Қазақстан Республикасының чемпионатына қатысуын аяқтау қарастырылған. Бұл "285-003 - облыстық құрамалардың түрлі спорт түрлері бойынша республикалық және халықаралық спорттық жарыстарға дайындалуы және қатысуы" бағдарламасы аясында жүзеге асырылады. Қазіргі уақытта басқарма осы шешімге сәйкес қолданыстағы мемлекеттік сатып алу келісімшарттарын реттеу бойынша заңнамалық рәсімдерді жүргізуде. Соның ішінде 2024-2025 маусымында Ақтөбе облысы атынан ерлер хоккей командасының Қазақстан Республикасының чемпионатына қатысуын аяқтау үшін 286 104 038 теңге сомасына қосымша келісімшарт жасау қарастырылған", – делінген хатта.
Айта кетейік, "Актобе" хоккей клубы қазір Pro Hokei Ligasy турнирлік кестесінде 34 ойыннан кейін 35 ұпаймен жетінші орында. Команда әзірге плей-офф ойындарына жолдама алатын клубтардың қатарында.
