Ақтауда бұрынғы қызын ұрып-соққан ер адамға бір емес екі айып тағылды
Маңғыстау облысы полиция департаменті Ақтауда көшеде бұрынғы қызын ұрып-соққан ер адам ұсталғанын мәлімдеді. Олардың сөзінше, ер адамға ұрлық жасау және дене жарақатын салу бойынша қылмыс жасады деген айтып тағылды. Бұл туралы Stan.kz ақпарат агенттігі хабарлайды.
Фото: Видеодан скрин
Полиция департаментінің дерегіне сенсек, бұл оқиға барысында әйел адамды ұрып-соғып, оның жеке мүлкін тартып алған. Оқиға туралы ақпарат полицияға хабарланғаннан кейін жедел-іздестіру шаралары басталып, ер адам бірден ұсталды.
“Қазір ол уақытша ұстау изоляторында отыр. Ал тергеу жұмыстары жалғасып жатыр. Тергеушілер қылмыстың мән-жайларын анықтап, қосымша құқық бұзушылықтарды тексеріп жатыр”, – делінген полиция хабарламасында.
Айта кетейік, желіде бұл жағдай сотталған экс-министрдің қылмысымен ұқсастығына байланысты ер адамды "Бишімбаевтың ізбасары" деп атаған.
Еске салайық, бұған дейін Ақтауда бір ер адам әйелді жұрттың көзінше ұрып-соққанын жазған едік. Бұл оқиға сыртқы бейнебақылау камерасына түсіп қалған. Видеодан ер адамның қызды бетінен ұрып, құлатқаны көрінеді.
Деректерге сүйенсек, жәбірленуші мен шабуылдаушы бұрын қарым-қатынаста болған. Бірақ ер адам үнемі сүйіктісіне қол көтере берген соң, онымен айырылысып кеткен. Жәбірленушінің достарының айтуынша, сонда да бұрынғы жігіті қызды үнемі соңынан аңдып, қорқытып, ұрып-соғады екен. Полиция бұл факт бойынша тергеу жүргізіп, оқиғаға қатысушыларды анықтап, сотқа дейінгі тергеу бастады.