АҚШ Вашингтонда Ұлттық гвардия сарбазы өлтірілген соң шетелдіктердің баспана сұрау өтінішін қарауды тоқтатты

Фото: Associated Press, Jessie Wardarski

Америка Құрама штаттары шетелдік азаматтарға арналған баспана беру туралы өтініштерді тоқтатты. Бұл туралы Stan.kz ақпарат агенттігі Euronews басылымына сілтеме жасап хабарлайды.

Мұны әлеуметтік желідегі парақшасында АҚШ азаматтық және иммиграция қызметінің директоры Джозеф Эдлоу хабарлады. 

“USCIS баспана беру мәселелері бойынша шешімдерді уақытша тоқтатты. Біз әрбір шетел азаматына барынша мұқият тексеру жүргіземіз. Сосын талаптарға сай іріктеу жасай алатын жағдай қамтамасыз етілгенше осылай болады. Америкалықтардың қауіпсіздігі әрқашан бірінші орында” – деп жазды ол.

Ал АҚШ мемлекеттік хатшысы Марко Рубио ведомствосы: “Ауғанстан паспортымен саяхаттайтын барлық тұлғаға виза беруді тоқтатамыз” деп хабарлады.

Сан-Диегодағы AfghanEvac ұйымының жетекшісі Шон ВанДайвер бұл шешімді саяси айла деп атады. 

“Олар бір қатыгез адамның әрекетін сылтау етіп, баяғыдан көздеп жүрген саясатын жүзеге асырып жатыр. Өздерінің барлау жүйесінің сәтсіздігінің салдарынан тұтас бір қауымдастықты және олармен бірге қызмет еткен ардагерлерді жазалауға сылтау іздеуде”, – деді ВанДайвер. 

Бұған дейін АҚШ президенті Дональд Трамп "үшінші әлем елдерінен" АҚШ-қа иммиграцияны уақытша тоқтататынын ескерткен еді. Ол бұл мәлімдемені Ақ үй маңында Ұлттық гвардия сарбаздарына жасалған қарулы шабуылдан кейін жасаған.

26 қарашада болған атыс салдарынан 20 жастағы әскери қызметкер Сара Бекстром қаза тапты. Тағы бір сарбаз 24 жастағы Эндрю Вульф ауыр халде ауруханада жатыр.

Оқиғаға байланысты 2021 жылы Ауғанстаннан АҚШ-қа қоныс аударған 29 жастағы Рахманулла Лаканвала ұсталды.

АҚШ прокуратурасының өкілі Жанин Пирро Рахманулла Лаканвалаға тағылған айыптар қатарында қару қолдана отырып кісі өлтіру мақсатымен жасалған шабуыл бойынша екі тармақ барын айтты. Оның сөзінше, “алдағы уақытта тағы да көптеген айып тағылуы мүмкін”.

Ресми деректерге сәйкес, Лаканвал АҚШ-қа 2021 жылы, америкалық әскердің Ауғанстаннан шығарылуына байланысты Байден әкімшілігі іске қосқан "Одақтастарға баспана" бағдарламасы аясында кірген. Оның баспана туралы өтініші Байден кезінде берілгенімен, Трамп әкімшілігі тұсында мақұлданған.

Лаканвал Ауғанстан әскерінің Орталық барлау басқармасының қолдауына ие. "Зеро" атты арнайы жасақтардың бірі ретінде танымал бөлімінде қызмет еткен. Мұны Хост провинциясындағы туысы растаған, бірақ қудалаудан қауіптеніп, аты-жөнін жарияламауды сұраған.