Өкілдер палатасындағы Небраска штатынан сайланған Дон Бэкон есімді республикашыл конгрессмен президенттің өкілеттігіне тікелей қарсы шығып, тарифтер мәселесінде Конгресстің құзыретін қалпына келтіруді көздейтін заң жобасын ұсынатынын мәлімдеді. Бұл заң жобасы Сенаттағы екіпартиялық ұсынысты қолдауға бағытталған.

Сенаттағы заң жобасы президентке тариф енгізу құқығына шектеу қоюды, соның ішінде кез келген тарифті кез келген уақытта Конгресс дауыс беру арқылы тоқтата алуын көздейді.

Сонымен қатар президент енгізілетін кез келген баж салығы туралы Конгреске 48 сағат ішінде хабарлауы керек, ал Конгресс 60 күн ішінде бұл тарифті тікелей мақұлдауы қажет. Тағы төрт республикашыл бұл заң жобасының тең авторы болды.

Бұл қадамға Трамптың партияластары оның тариф енгізуі салдарынан қор нарығының күрт құлдырауынан кейін барып отыр. Бұған дейін Өкілдер палатасындағы республикашылар президенттің төтенше жағдай жариялау арқылы енгізген тарифтерін Конгресс арқылы алып тастау әрекеттеріне жол бермейтін шараны мақұлдаған еді.

Өкілдер палатасындағы демократтар сенатор Тим Кейннің (Вирджиния штаты, демократ) Канадаға қатысты Трамп енгізген жалпы баж салығын жою туралы қарарын дауысқа салуға тырысып жатыр. Бұл қарарды осы аптада Сенаттағы төрт республикашыл да қолдаған.

"Тариф соғысын" бастаған Трамптың мәлімдемесінен кейін қор нарығы құлдырап кетті

Зауыттар кідіріп, өндіріс баяулайды: Трамп енгізген баж салығының Қазақстанға ықпалы қандай

Еске салайық, бұған дейін АҚШ президенті Дональд Трамп Ақүйде өткен баспасөз мәслихатында 180-нен астам елге жаңа сауда тарифтерін енгізетінін мәлімдеді. Олардың қатарында Қазақстан және бұрынғы Кеңес Одағының басқа да мемлекеттері болғанымен, тізімде Ресей жоқ. Айта кету керек, Қазақстан жоғары тарифтер енгізілген елдердің қатарында. Қазақстанға осы өңірдегі ең жоғары мөлшерлемелердің бірі – 27% белгіленді.

Талқылау