Ақмола облысында жол ережесін бұзған адамды ұстауға көмектескен 10 жасар бала марапатталды
Фото: polisia.kz
Ақмола облысында 10 жасар бала полицияға құқық бұзушылықты анықтауға көмектесті. Осы үшін оқушы мен оның анасы марапатталды. Бұл туралы Stan.kz ақпарат агенттігі хабарлайды.
25 қараша күні мектеп оқушысы Алан Колмагоров “102” нөміріне қоңырау шалып, сұр түсті автокөлік жүргізушісінің жол қозғалысы ережелерін өрескел бұзғанын хабарлаған.
“Жасына қарамастан, бала автокөліктің маркасын, түсін және мемлекеттік нөмірін нақты көрсеткен. Уақытында түскен ақпараттың арқасында патрульдік полиция бірден әрекет етіп, көлікті тауып, тоқтатты. Кейін оның автокөлікті айдап әкеткен адам екені анықталды”, – делінген хабарламада.
Түркістан облысында 20 жылдан бері жол ережесін бұзбаған жүргізуші марапатталды
Полиция департаментінің басшылығы баланың әрекетін елеусіз қалдырмады. Полицейлер Көкшетау қаласындағы №12 орта мектепке барып, 10 жастағы Алан Колмагоровқа және оның анасы Юлия Колмагороваға алғыс хат табыс етті.
Сонымен қатар оқушыға велосипед пен патрульдік автокөліктің үлгісі сыйға берілді. Полицейлер баланың жауапкершілік танытып, азаматтық ұстаным көрсеткенін ерекше атады.
“Кездесу барысында Алан ереженің бұзылғанын досымен бірге көргенін, алайда полицияға өзі хабарлағанын айтты. Өйткені жүргізушінің әрекеті ауыр салдарға әкелуі мүмкін екенін түсінген”, – делінген хабарламада.
Балақайдың анасы да ұлының кішкентай кезінен жауапкершілікке бейім екенін, әділдік қағидаларын берік ұстанатынын және өз пікірін ашық қорғайтынын айтты.
Полиция қызметкерлері азаматтардың, соның ішінде кәмелетке толмағандардың дер кезінде берген хабарламалары қоғамдық тәртіпті қамтамасыз ету, жол қауіпсіздігін сақтау және қауіпті жағдайлардың алдын алу үшін аса маңызды екенін айтты.
Айта кетейік, бұған дейін Маңғыстауда полиция басшысы мен орынбасарлары қылмыстық топ құрды деген ақпарат тараған еді.
"30 минутқа созылады, тез келемін деген еді": Астанада көзіне лазерлі ота жасатуға барған жалғызбасты ана қаза тапты
