Абай облысындағы дала өрті орман алқабына тарады
Абай облысының Бесқарағай ауданында шыққан дала өрті орман алқабына тарады. Бұл туралы Stan.kz ақпарат агенттігі хабарлайды.
Видеодан скрин
Төтенше жағдайлар министрлігінің мәліметінше, жалынның таралуына күшті жел ықпал етуде.
“Бүгін күндіз Абай облысының Бесқарағай ауданы Ерназар ауылдық округінің Қоянбай ауылында құрғақ шөптің жануы орын алды. 26 м/с дейін екпінді жел өрттің тез таралуына ықпал етті. Дала өрті ішінара "Семей орманы" МОТР Морозов филиалының орман алқабына өтті”, – делінген министрлік хабарламасында.
Арнайы жедел штаб құрылған, оны вице-министр Батырбек Әбдішев басқаруда.
“Өртті сөндіруге Абай облыстық, Павлодар облыстық ТЖД, "Семей орманы" және "Ертіс орманы" орман шаруашылықтарының күштері мен құралдары, сондай-ақ жергілікті атқарушы органдар жұмылдырылды. Барлығы 240 адам және 96 бірлік техника тартылды. Әуеден барлау жүргізілуде”, – делінген хабарламада.
Еске салсақ, бұған дейін Павлодар облысының Баянауыл ауданындағы Жасыбай орман шаруашылығында өрт шыққаны туралы жазған едік.