Абай облысында мүгедектігі бар адамнан ақша бопсалап, ұрып өлтіргендер бостандықта жүр
Былтыр қаңтар айында Мұқыр ауылының тұрғыны 42 жастағы Жәнібек Апбасовты әкесі өз үйінен қансыраған күйі тапқан. Бүкіл денесі көгерген ер адам ауыр жарақат салдарынан ауруханада көз жұмды. Марқұмның отбасы Жәнібекті ұрып-соғып, ақша бопсалағандардың әлі күнге дейін жазаланбай, бостандықта жүргеніне наразы. Бұл туралы Stan.kz ақпарат агенттігі 31-арнаның Информбюро жаңалықтар қызметіне сілтеме жасап хабарлайды.
Фото: Видеодан скрин
Марқұмның жақындарының айтуынша, ауруханаға жеткізілген Жәнібектің миы шайқалып, іш құрылысы зақымданып жансақтау бөлімінде жан тапсырған.
“Бірден ауруханаға алып кетті. “Артынан еріп барыңдар” деді. Біз жолдасым екеуміз артынан еріп бардық. Енді онда әртүрлі шаралар өткізді де одан кейін бізге “кете беріңдер, жағдайы ауыр, қатты миы шайқалған” деді. Біздің ойымызда ештеңе жоқ кетіп қалдық”, – дейді қарындасы Жанаргүл Апбасова.
Жәнібек талма ауруы бар екінші топтағы мүгедек еді. Оның жақындары полиция әу баста істі тоқтатып тастағанына наразы болып, тәуелсіз сараптама жасатқандарын айтады. Оның қорытындысына сәйкес, Жәнібек Апбасов ұзақ уақыт бойы соққыға жығылған.
“Сараптаманы қолымызға алдық. Енді осы суреттерге қарап, үш апта бұрын қабырғасы сынғанын анық көрдім. Одан кейін жалақы алатын күні басынан екі соққы алған. Соққының ауыр болғаны соншалық денсаулығына қатты зиян тиген. Кейін басынан, 25 ең маңызды дене мүшелерінен қатты ауыр соққылар алған”, – дейді Жәнібектің қарындасы.
Марқұм мектепте аула сыпырушы болып жұмыс істеген. Туыстары қазаға әріптесі мен ауылдасын кінәлап отыр. Айыптауларға марқұмның телефонындағы смс хабарламалар себеп болған. Айтуларынша, күдіктілер Жәнібекті бопсалап келген. Бірақ бұл сөздерді тергеліп жатқан азаматтың бірі жоққа шығарды.
“Жала жабылып отыр. “Міне осындай жерде болды” деген таза дәлел жоқ. Дәлел жоқ болғаннан кейін, бұл бір жағынан менің өзім бала-шағама да қиын соқты. Ауылдан да ұят. Араласып көрген жоқпын”, – дейді Мұқыр ауылының азаматы Дәурен Шәмшекбаев.
Полиция "денсаулыққа қасақана ауыр зиян келтiру" бабы бойынша іс қайта қозғалғанын жеткізді. Жәнібек Апбасов ажырасқан. Бір баласы бар. Марқұмның ағайын-туысы тергеу тым созылып кетті дейді. Бір жыл үш ай өтсе де кінәлілердің әлі қамалмағанына қапалы.
Бұған дейін Теміртауда зейнеткерді ұрып-соққан жасөспірімдер үшін әкімнің орынбасары жазаланған еді.