604 963 теңге: Қазақстанда орташа жалақы өседі деп болжанып отыр
Фото: Stan.kz
Ұлттық экономика министрлігі 2026-2028 жылдарға арналған Қазақстанның әлеуметтік-экономикалық даму болжамдарын мақұлдады. Құжатқа сенсек, үш жылдан кейін қазақстандықтардың табысы айтарлықтай өседі. Бұл туралы Stan.kz ақпарат агенттігі хабарлайды.
2028 жылға қарай бір қызметкердің орташа айлық жалақысы 604 963 теңгеге жетуге тиіс. Салыстыру үшін 2025 жылы бұл көрсеткіш 423 133 теңге болған.
Министрліктің ресми болжамына сәйкес, Қазақстандағы орташа жалақы мынадай болады:
2025 жылы – 423 133 теңге;
2026 жылы – 500 890 теңге;
2027 жылы – 554 154 теңге;
2028 жылы – 604 963 теңге.
Нақты жалақының өсуі (инфляцияны ескере отырып) әлдеқайда қарапайым: 2026 жылы 7,6%-ға көтеріледі, 2027-2028 жылдары – шамамен 3%-ға өседі. Минималды жалақы өзгеріссіз қалады – 85 мың теңге. Ал ең төменгі күнкөріс деңгейі өседі: 2025 жылғы 46 228 теңгеден 2028 жылы 57 405 теңгеге дейін. 2024 жылы қазақстандықтардың орташа жалақысы 405 400 теңге болған. Бұл ресми дерек бойынша өткен жылға қарағанда 11,3%-ға өскен. Бірақ инфляцияны ескергенде, қалтаға түскен нақты өсім бар болғаны 2,4 пайыз ғана болып шықты.
2025 жылдың маусымында әр қазақстандықтың жан басына шаққандағы орташа табысы 231 100 теңге болды. Алайда нақты есептеулерге қарасақ, бұл көрсеткіш тіпті 2,6%-ға төмендеген. Алдағы жылы инфляция 10-11% шамасында болады деп күтіледі. Үкімет 2028 жылға қарай оны 5-7%-ға дейін төмендетуді жоспарлап отыр. Сол уақытқа қарай ел халқының саны 21 миллионнан асып, жұмыссыздық деңгейі шамамен 4,7% деңгейінде тұрақтайды деген болжам бар.
Жалақының қағаз жүзіндегі өсімі шынында әсерлі көрінеді: төрт жылда шамамен 200 мың теңгеге артады. Бірақ бұл ақшаның шын мәнінде қаншалықты пайда әкелетінін дүкендегі баға шешпек. Егер инфляцияны шынымен ұстап тұрса, қазақстандықтардың табысы өседі. Ал егер баға қымбаттай берсе, қосылған айлықтың бәрі "супермаркет кассасында" қалып қоюы мүмкін.
Айта кетейік, бұған дейін 2026 жылға арналған алдын ала айлық есептік көрсеткіш мөлшері жарияланған еді.
"Орташа айлық 1,2 миллион теңге": Қазақстанда қандай мамандықтар жоғары жалақы алады
Еске салайық, бұған дейін Қазақстанда жалақыны конвертпен беруге тыйым салынатынын жаздық. Еңбек және халықты әлеуметтік қорғау министрі Светлана Жақыпованың айтуынша, кей жағдайларда жоғары білікті мамандар ресми құжат бойынша небәрі 85 мың теңге алады, ал қалған бөлігін жұмыс берушілер салық түсімін азайту үшін “конвертпен” қолма-қол береді.
Радикализмнен қорғанудың жолы – иммунитет қалыптастыру: Теріс ағымнан сақтануда діни білімнің маңызы қандай
