35 миллион теңгеге жанармай ұрлаған ҚТЖ қызметкері шартты түрде сотталды
35 миллион теңгеге жанармай ұрлаған “Қазақстан темір жолы” филиалының Жамбыл магистральдық желі бөлімшесінің бас механигі Серік Садықов 7 жылға шартты түрде сотталды. Бұл туралы Stan.kz ақпарат агенттігі хабарлайды.
Фото: Stan.kz
Сот шешімін Тараз қаласының №2 сотының судьясы Қайрат Дөңбаев оқыды.
Іс материалдарына сәйкес, Садықов 2020 жылдың қаңтарынан 2023 жылдың желтоқсанына дейін жанар-жағармай ұрлаумен айналысқан. Ол арнайы техниканың бағыт парақтарына жалған мәліметтер енгізіп, осы арқылы 162 мың литр дизель отынын ұрлаған. Шығын көлемі – 35 миллион теңге. Тергеу барысында Садықов келтірілген шығынды толық өтеді.
Сот айыпталушының өз кінәсін мойындап, шығынды өтеп, өз ісіне өкінгенін ескерді. Серік Сыдықов Қылмыстық кодекстің 189-бабы 4-бөлігінің 2-тармағы бойынша кінәлі деп танылып, оған жеті жыл шартты мерзімге бас бостандығынан айыру жазасы тағайындалды.
Бұған дейін “Қазақстан темір жолына” еншілес компанияның 12 миллиард теңгеге заңсыз келісім жасағаны туралы жазған едік.