2026 жылғы футболдан әлем чемпионатына билеттер сату күні белгілі болды

Фото: instagram.com/fifaworldcup

2026 жылы өтетін футболдан әлем чемпионатына билеттер сату науқанының басталатын күні жарияланды. Бұл туралы Stan.kz ақпарат агенттігі хабарлайды.

ФИФА ұйымының ресми мәліметінше, жанкүйерлер үшін билет сатып алу процесі 2025 жылдың ақпан айында басталады. Нақты күн алдағы апталарда жарияланбақ.

Келесі әлем біріншілігі алғаш рет үш елде — АҚШ, Канада және Мексикада бір уақытта өтеді. Жарыс 2026 жылдың 11 маусымы мен 19 шілдесі аралығында ұйымдастырылады. Бұл турнир тарихтағы ең ауқымды чемпионат болмақ — алғаш рет жарысқа 48 ұлттық құрама қатысады.

ФИФА билет сатылымын бірнеше кезеңге бөліп өткізуді жоспарлап отыр. Алғашқы кезеңде өтінім беру жүйесі арқылы таңдау жасалса, кейінгі сатыларда тікелей сатылым жүреді.

Ұйымдастырушылар стадиондар мен матчтарға сұраныстың жоғары болатынын ескертіп, жанкүйерлерге ресми сайт арқылы алдын ала тіркелуге кеңес беруде.