"20 мың қоясыңдар": Шығыс Қазақстанда жасөспірімдер оқушы қызды ұрып-соғып, кешірім сұрауға мәжбүрледі
Әлеуметтік желіде Шығыс Қазақстан облысында жасөспірімдер арасында түсірілген видео тарады. Видеодан оқушы қыздың тізерлеп басқа қыздардан кешірім сұрап тұрғанын көруге болады. Видеоны түсірген жасөспірімдер оны балағаттып, қоқан-лоқы көрсетіп жатты. Бұл туралы Stan.kz ақпарат агенттігі хабарлайды.
Фото: Видеодан скрин
Оқушыны бопсалап тұрған үш қыздың бірі видео түсіріп тұр. Қалған екеуі темекі тартып, қызға аузына келгенін айтып, тіл тигізді. Олардың бірі қызды бірнеше рет бетінен ұрып жіберді. Видеодан оқушы қыздың “қыздар, ұрмаңдаршы, өтінемін” деп жалынған даусын естуге болады.
Жасөспірімдер қызды тізерлеп кешірім сұрауға мәжбүрлеп, 20 мың теңге ақша беруге міндеттеді.
“Ертең екеуің 10 мың теңгеден 20 мың теңге қосыңдар. 20 мың теңге Kaspi-де тұратын болсын”, – деп оқушы қыздың жанындағы құрбысын меңзеді.
Жергілікті полиция болған жағдайға қатысты сотқа дейінгі тергеу басталғанын мәлімдеді.
“Жанжалға қатысы барлардың бәрі анықталды. Кәмелетке толмаған жасөспірімдер ата-аналарымен полицияға жеткізілді. Сондай-ақ барлық құқық бұзушылардың ата-анасының немесе заңды өкілдерінің жауапкершілігі қарастырылады. Әкімдік жанындағы кәмелетке толмағандардың құқықтарын қорғау комиссиясына жолдауға материал дайындалып жатыр”, – деп мәлімдеді полиция.