Осы жылдың 10-қарашасы күні түс ауа 15 сағат 10 минут шамасында «Ақтөбе – Орынбор» бағытында келе жатқан жолаушылар автобусына шекаралық бақылау жасаған «Жайсаң – авто» бақылау-өткізу бекетінің шекарашыларына 1996 жылы туылған «Диана» есімді қазақстандық азаматша жекебас куәлігімен қоса жол жүру билетін де ұсынды.

Кенеттен шекарашылардың көзі жол жүру билетіндегі «помогите!» деген жазуға түсе кетті. Отан сақшылары жағдайды бірден түсіне қойды. Қыздың қимылы да баяу, өзі әлденеден қорқатын сияқты. «Құжаттарыңыз дұрыс емес» деген сылтаумен шекарашылар қызды автобустан түсіріп алып қалды.

Шекаралық бақылау-өткізу бекетінің ғимаратына кіргеннен кейін «помогите!» деген жазуға байланысты оқиғаны қыздың өзі-ақ айтып берді. Ауылдан жұмыс іздеп келе жатқан қызға екі жігіт жолығады. Олардың біреуі одан сағат сұрайды. Қолсөмкесін ашып, ұялы телефонын алып жатқан кезде әлгілердің біреуі телефонды тартып алып, қызды оңаша алып шығып, соққыға жығады. Бағынбаған қызға пышақ көрсетіп, ол пышақпен білегінен бастап шынтағына дейін тіліп жібереді. Сөйтеді де, егер өмір сүргісі келсе автобусқа билет алып, Ресейге бару керектігін, ал ол жақта оны әлдебіреулердің күтіп алатындығын айтады. Қорқаулар, автобуста өздерінің адамының бар екендігін де ескертіп қызды әбден қорқытып қояды.

Қазіргі уақытта аталған дерек бойынша материалдар Мәртөк аудандық ішкі істер бөліміне берілді. Ал жолаушы қыз қазақстандық шекарашыларға шексіз алғысын білдірді.

Талқылау