Қатерлі ісік ауруына шалдыққан бүлдіршіндерді жазып шығу оңай емес. Десек те, індет ертерек анықталып жатса баланың құлан-таза айығып, ел қатарына қосылып кетуі әбден мүмкін. Марғиза Қараитова немересі Наинаның лейкоз ауруына 9 жасында душар болғанын айтады. Әжесі бір жылдам астам уақыт немересімен бірге онкологиялық ауруханада жатып, барлық тиісті емді алып шығады. Бүгінде жасы 14-ке келген жасөспірім қатерлі ісікті жеңіп, достарынан қалмай мектепке барып жүр.

«Химиясын алдық, ақырын-ақырын бала бері қарады. Онда жатқандағы қиыншылығымыз енді адам басына бермесін, бірақ сондай аурудан шығарып алғанға бір жағынан өзімізге де қуанышты, екінші жағынан медиктерге де көп рақмет», – дейді әжесі Марғиза Қараитова.

Қазақстанда онкологиялық диспансерлерде 4 мыңға жуық бала есепте тұр. Олар үшін емдік-шаралардың барлығы тегін. Алайда онкологтардың айтуынша, науқастардың 70 пайызында ауру 3-4 сатыға жеткенде ғана анықталып жатады.

Қатерлі ісік ауруы кез-келген аурудың астарында жатуы мүмкін. Тіпті қарапайым дене қызуының көтерілуі, әлсіздік, баланың қайта-қайта ұйықтай беруі, сабақ үлгерімінің төмендеп кетуі – аурудың алғышарттары болуы ықтимал. Баланың денесінен кез-келген ісік, лимфалық түйіндердің өсуін байқағанда дереу дәрігерге қаралу керек. Ең бастысы ата-аналарға айтарым, ешқашан ауырған баланы өз бетімен емдеуге болмайды.

Бұл театрландырылған қойылымның барлық жас әртістері – қатерлі ісік ауруына шалдыққан балғындар. Балалардың өмір сүруге деген үлкен құштарлығы, ата-ананың қайсарлығы мен төзімі әрі уақтылы білікті медициналық көмек – болашаққа үміт сыйлайды.

Сол үміт балаларды өмір сахнасына қайта әкеледі.

Оқи отырыңыз:

Көкшетау тұрғыны ғаламторда дәрігердің қарамағанын жазғаны үшін сотта кінәлі болды

«Оскарды» ұтқан әйгілі гримерді Назарбаев туралы фильм түсіріліміне шақыртты

Бағдат Мусин: Қазіргі жастар 4 жыл тайраңдап бос жүреді, тек диплом алса болды

Ақтөбеде дін жолында жүрген ата-аналар намаз оқитын таксист іздейді

Талқылау