Қазақстан қырғыздарға 100 млн доллар көмек беретін болды
Еуразиялық экономикалық интеграция жағдайында экономикалық ынтымақтастықты дамыту туралы келісім аясында Қазақстан қырғыздарға 100 млн долларға көмек көрсететін болды.
Фото: Akorda.kz
Бұл туралы Sputnik Қазақстан хабарлайды.
Келісім 2014 жылғы 7 қарашада Қазақстан мен Қырғызстан арасындағы Жоғарғы мемлекетаралық кеңес отырысының аясында мемлекет басшылары берген тапсырмаға сәйкес әзірленген. Құжатқа 2016 жылғы 28 желтоқсанда қол қойылды.
“Келісім нормаларына сәйкес, Қазақстан тарапы Қырғызстанның Еуразиялық экономикалық одаққа интеграциясы процесіне жәрдемдесу мақсатында аталған елге 100 млн АҚШ долларына пара-пар көмек көрсетеді. Көмек қырғыз тарапына Еуразиялық экономикалық одаққа қосылуы жөніндегі “Жол карталарында” көзделген шараларды іске асыруға, атап айтқанда ЕАЭО кедендік шекарасының қырғыз учаскесінде кедендік инфрақұрылымды жақсартуға, Қырғызстанның санитарлық, ветеринарлық, фитосанитарлық жүйелерін одақ талаптарымен сәйкестендіруге беріледі”, — деп баяндады мәжілістің жалпы отырысында ҚР Ұлттық экономика министрі Тимур Сүлейменов.
Оның айтуынша, көмек техникалық жәрдемдесу туралы үкіметаралық жекелеген хатталамаларға сәйкес, кезең-кезеңмен ақша, тауарлар, мамандарды оқыту түрінде берілетін болады.
“Кезекті көмек беру траншын қалыптастыру мақсатында Қырғызстан жағы іс-шаралар тізбесін, сонымен қатар көмектің негізділігін растайтын құжаттардың болуы туралы қорытындыны ұсынады. Ұсынылған көмектік мақсатқа сай және тиімді жұмсалуын бақылау бағытында Қазақстан-Қырғызстан үкіметаралық кеңесі аясында бірлескен екіжақты тексеру комиссиясы құрылады. Тұтастай алғанда, мемлекеттік шекараның қазақ-қырғыз учаскесінде ветеринарлық бақылауды алып тастау болжамын ескерсек, Еуразиялық экономикалық одақтың сыртқы сұлбасында қырғыз өткізу бекеттерін жарақтандыру үдерісіне барынша көмек көрсетуге Қазақстан мүдделі екенін айта кету керек”, — деді Сүлейменов.
Оның сөзінше, бұл өз кезегінде Қазақстан аумағына көрші елден және ЕАЭО-ның басқа да елдерінен әкелінетін тауарлардың қажетті қауіпсіздік деңгейін қамтамасыз етуге мүмкіндік береді.
Оқи отырыңыз:
Министр зейнетақының үш кезеңде қалай және қаншаға өсірілетінін айтып берді
Зейнетақы қоры Әзірбайжан банкіне салған 71 млрд ақшаны қайтара алмауы мүмкін
Юаньнің құнсыздануы Қазақстанға қалай әсер етеді
БЖЗҚ-ның экс-төрағасы Руслан Ерденаевтың тағы бір былығы әшкере болды