Тар жеркепенің ішінде қазір 7 адам бірге өмір сүріп жатыр. Оның бесеуі бала. Ал, Астанада жақында өртеніп қайтыс болған 5 қыздың оқиғасынан кейін мына үйдің ішінде де дәл сондай қайғылы оқиға орын ала жаздаған. Мына жерде тұрған ағаштан жасалған үстел оттың қызуынан тұтанып жана бастаған. Ал, бұл кезде үйдің іші қою, қара түтінге толған. Бұны балалар байқамаған. Ал, отағасы абырой болғанда уақытында келіп балалардың өмірін аман алып қалыпты”.

Ормановтар отбасы мына аядай жерде бес баласымен бірге 10 жыл бойы тұрып келеді. “Екі қолға бір күрек” деген жұптың арманы мөлдіреген бүлдіршіндерді жеткізу. Сол үшін қолдарынан келгенше қаражат тауып, “балаларды аш қалдырмасақ”- дейді. Өстіп жүргенде, қапыда құлыншақтардан қол үзіп қала жаздады.

Оқиға кешкі 9-дар шамасында болған. Алыс жолдан келген отағасы бөлменің ішін қаулаған түтінді көріп, жанұшыра балаларды сыртқа шығарыпты. Бұл уақытта көпбалалы ана жұмыста болған.

“Жұмыс істемеуге лажым жоқ, басымызда несие, күйеуім жұмыссыз жүр “- деп мұңаяды.

“Кеше 5 бала жанып кетті. Сол сияқты біздің де үйіміз жанып кетейін деді.Мен жұмыста болдым. Папасы жол жүріп келген. Келіп, өшіріп далаға шкафтарды шығарып тастадым дейді”, – дейді көпбалалы ана Ақнұр Орманова.

Айы оңынан туып, уақытында перзенттерін құтқарып қалған әкенің қуанышында шек жоқ. Алайда, аз ақшаны қайда жеткізуді білмей өмір сүруден әбден шаршадық дейді. Ал, қоғам белсенділерінің пікірінше, ана түсінігі еліміздегі ең құрметті есімге әлі айналмай келеді. Баспана бірінші берілуі керек, сондай-ақ әлеуметтік көмектен де аналарды құр қол қалдырмау керек дейді.

“Бүкіл жағдайды жасау керек үкімет. Құдайға шүкір біздің кейбіреулер айтады ана бюджетіміз жетпейді, анаған керек мынаған керек. Жамап жатамыз деп. Мен ойлаймын қомақты қаржы жай шашылып жатыр өкінішке орай. Бізде де, Астананың өзінде, облыстарда. Сондықтан, мәселе бюджетте дұрыстап жоспарлауда”, – дейді қоғам белсендісі Арман Шораев.

Көпбалалы аналар үшін жасалатын жағдай баспана алудағы жеңілдіктен басталуы тиіс.Ол үшін “мемлекеттік жеңіл баспана бағдарламаларының санын арттыру керек”- дейді қоғам жанашырлары. Ал, биліктегілер “көп перзенттілердің алдындағы парыз өтеледі, алдағы уақытта қабылдаған шешімімізді айтамыз” -деп отыр.

“Үкіметтің жанынан жұмыс тобы құрылды. Елбасының тапсырмасымен, сол топ екі аптаның ішінде ұсыныстардың барлығын жасап, көп балалы аналар, көп балалы жанұялар бойынша сол ұсыныстар қабылданатын болады. Екі аптадан кейін ол жарияланатын болады”, – дейді ҚР Еңбек және халықты әлеуметтік қорғау министрінің орынбасары. Нұржан Әлтаев.

Елімізде, Ақнұр сияқты баласының қамын ойлап, кедейліктен көз жасы құрғаған аналар жетерлік. Олардың арманы бір – баспана…Сондықтан, “үкіметке мұңымызды айтып, көмек сұраудан басқа амалымыз жоқ” дейді.

Stan.kz сайтын Telegram арқылы оқыңыз. Арнамызға жазылыңыз.

Талқылау