“Мен кез келген әйел сияқты тоқал алуына қарсымын. Бірақ сондай шешім қабылдап жатса: “Жолың ашық” деймін. Бірақ бірге тұрмаймын”, – дейді Мөлдір Мұқанова.

Продюсер көпшілік алдына шықпай тұрып мемлекеттік қызметте жүрген кездерін еске алды.

“Мен 15 жыл Қазынашылық департаментте мемлекеттік қызметкер болып жұмыс істедім. Бүкіл мемлекеттік мекемелердің бюджеттік есебін ашып, қай жаққа қанша ақша кетіп жатқанын, қай шенеунік қанша ақша алып жатқанын біліп отыратынмын. Есепті жылдың аяғында жабамыз, түнгі сағат 2-3-ке дейін жұмыс істейтін кездеріміз болды. Жай күндері жұмыстан сағат 18:00-де шығамын. 18:20-да үйде болмасам, у-шу басталып кететін. Азаматым қызғаншақ болды. Мен бірінші қызымды босанған соң өте әдемі болып кеттім. Өмірімде болмаған, салмағым 60 келі болды, одан сайын жасарып кеттім. Сөйтіп күйеуім қызғана бастады. Жұмыстан шықсам, келіп тұратын. Көлігіміз жоқ, екеуіміз үйге автобуспен қайтатынбыз. Жұмыстан уақытында шықпасам, екінші қабаттың терезесіне жерден тас алып лақтыратын. Сонда құжаттардың бәрін жинап, тез шығып кететінмін. Кейде тас бастықтың терезесіне тиеді. Сонда бастығым келіп: “Күйеуің келді, бар” дейтін. Содан кейін Ұлттық банкте бас экономист болып жұмыс істедім. Сөйтіп төртінші баланы босанғаннан кейін мемлекеттік қызметпен қоштастым”, – дейді Мөлдір Мұқанова.

Бұған дейін Мөлдір Мұқанова кенже баласын босанар кезде нендей күйзелісті бастан өткергенін айтқан болатын.

Талқылау