Жамбыл облысында балаларды құлдықта ұстаған: Күдікті ұсталды
Фото: Полиция
Жамбыл облысы Талас ауданында балаларды құлдықта ұстаған күдікті ұсталды. Полиция балаларды соққыға жығу ісін тергеп жатыр. Бұл туралы ведомствоның ресми өкілі Шыңғыс Әлекешов жазды, деп хабарлайды Stan.kz ақпарат агенттігі.
Оның айтуынша, Ішкі істер министрі Ержан Сәденов Жамбыл облысының Талас ауданында екі кәмелетке толмаған баланы жүйелі түрде соққыға жығу дерегі бойынша қылмыстық істің тергелуін жеке бақылауына алды
“Күдікті уақытша ұстау изоляторына қамалды. Балаларға медициналық және психологиялық көмек көрсетілуде.
Жергілікті полиция қызметкерлеріне қатысты қызметтік тексеріс тағайындалды”, – деп жазды Шыңғыс Әлекешов.
Ішкі істер министрлігі балаларға қатысты кез келген зорлық-зомбылық қатаң түрде тоқтатылатынын және барлық кінәлілер заңға сәйкес жауапқа тартылатынын атап өтті.
Естеріңізге сала кетейік, бұған дейін Жамбыл облысының Талас ауданында балалар өздерін күштеп ұстап, мал бағуға мәжбүрлегенін хабарлаған еді.
Облыстық полиция департаменті кейін кәмелетке толмағандарды Тараз қаласындағы қиын жағдайдағы балаларды қолдау орталығына жеткізгенін хабарлады. Онда тергеу әрекеттері жүргізіледі және балаларға психологиялық және құқықтық көмек көрсетіледі.
Соңғы бес жылда 1,5 миллиардқа жуық теңгеге 47 мультфильм түсіріліп, тек төртеуі экранға шыққан
