"Марвин мен Меломан дүкендерінде кітап іздеп, кеңесшіге қазақша сұрақ қойдым. Ол маған бақырайып қарады да, орысша жауап беріп, қаша жөнелді. Екіншісінен сұрасам, "Қазір қазақтілді кеңесші шақырамын" деді де, жоқ болды. Бұл не масқара? Қазақстанда, өз елімде, қазақша қызмет алу үшін осылай жалынуым керек пе? Мемлекеттік тілде қызмет көрсету – заңды талап, ал сіздер оны өрескел бұзып отырсыздар”, – деп жазды Әсел Рысбекова.

Әсел Рысбекова қазақ тілін білмейтін қызметкерлерді жұмысқа алу мәселесіне өз наразылығын білдірді. Ол бұл жағдайдың өзіне ғана емес, көптеген қазақтілді азаматтың намысына тиіп, көңілін қалдыратынын айтты.

"Меломан-Marwin" командасынан жағдай туралы толығырақ білдік. Олар тілшімізге аталған жайтқа қатысты шаралар қабылдайтынын мәлімдеді.

"Жалпы, біз сауда нүктелерімізде мемлекеттік тілде қызмет көрсетуді назардан тыс қалдырмаймыз. Жұмысқа алған мамандарымыздың қазақ тілін меңгергеніне басымдық береміз. Кез келген кәсіпкерлік нысан тұтынушының тілінде, әсіресе қазақ тілінде кедергісіз қызмет көрсетуі қажет. Қызмет кезінде әрқашан жоғары сапа мен клиенттеріміздің тілектерін бірінші орынға қоямыз. Қазақша еркін сөйлей алмайтын қызметкерлеріміздің жұмысқа қабылдануы біздің саясатымызға қайшы екені анық. Бұл мәселеге назар аударып, жұмысымызды жетілдіру үшін тиісті шаралар қабылдаймыз. Қызметкерлерді тілді меңгергені бойынша қайта даярлауды ұйымдастырып, мұндай жағдайларды болдырмау үшін нақты қадамдар жасаймыз. Қазақ тілінде қызмет көрсету біз үшін маңызды. Осы секілді жағдайлар қайта болмауы үшін жұмысымызды жақсартуға тырысамыз", – деп жауап берді компания.

Айта кетейік, бұған дейін әлеуметтік желіде "Меломан-MARWIN" дүкендер желісінің ассортиментіне қатысты өзгерістер қызу талқыланған еді. Сатып алушылар арасында винил пластинкалар, Гарри Поттер әлеміне арналған сувенирлік өнімдер, Таро карталары және LEGO конструкторлары сатылымнан жоғалып кетуі мүмкін деген алаңдаушылық бар.

Таяуда Threads әлеуметтік желісінде бұл тақырыпқа қатысты жазбалар көбейген.

"Жарайды, винил, Роулинг кітаптары, Таро – бұларды басқа жерден табуға болады, бірақ LEGO ше?! Шынымен оларды да алып тастай ма?" – деп жазды желі қолданушылары.

2024 жылдың соңында "Меломан" холдингінің негізін қалаушылар және иелері Александр мен Игорь Дериглазовтар өз активтерінің шамамен 50%-ын Aqniet Group компаниясына сатқан еді. Енді компанияның мажоритарлық акционері Қайрат Итемгенов болды. Осы талқылауларға байланысты дүкендер желісі әлеуметтік желідегі бір жазбаға түсініктеме қалдырды.

"Винил пластинкалары сатылымнан жоғалмайды, керісінше, дүкеннің ыңғайлы аймағына көшіріледі. Сонымен қатар Гоголь көшесі, 58 мекенжайындағы филиалдың балконында арнайы тыңдау аймағы ұйымдастырылып, онда сатып алушылар пластинкаларды тыңдай алады. Гарри Поттер өнімдері маусымдық себептерге байланысты уақытша сатылымнан алынып, жақын арада қайта оралады. Джоан Роулингтің кітаптары ассортиментте қалады. Сонымен қатар Таро карталары сұраныстың төмен болуына байланысты сатылымнан алынды. Тәттілер де өз орнында қалады", – деп түсіндірді компания.

Алайда LEGO конструкторлары туралы ресми жауапта ешқандай ақпарат берілген жоқ.

Талқылау