Ұлттық банк базалық ставканы 16,5% деңгейінде сақтап қалды
Ұлттық банк базалық ставканы 16,5% деңгейінде сақтап қалу туралы шешім қабылдады. Бұл туралы Stan.kz ақпарат агенттігі хабарлайды.
Фото: Яндекс Карты
Ұлттық банк мәліметінше, жылдық инфляция наурыз қорытындысы бойынша 10%-ға дейін жеделдеп, болжамды диапазон шегінде қалыптасты.
"Жылдық инфляцияның негізгі қозғаушы күші – қызмет көрсету секторы. Бұл реттелетін тарифтердің бірінші тоқсанда күткеннен жоғары өсуімен және нарықтық қызметтердің қымбаттауымен байланысты. Азық-түлік инфляциясының үлесі айлық және жылдық көрсеткіштерде арта түсті. Айлық динамикада тұрақтанудың алғашқы белгілері байқалды. Инфляция ақпандағы 1,5%-бен салыстырғанда наурызда 1,3%-ға дейін баяулады. Бұл азық-түлікке жатпайтын тауарлар мен нарықтық қызметтердің бәсеңдеуіне байланысты. Базалық инфляция – 0,9%, ал маусымдық әсерлерден тазартылған инфляция – 1,0% деңгейінде қалыптасып, ұқсас динамика көрсетті", – делінген хабарламада.
Ұлттық банк хабарлауынша, инфляция қаңтар-наурыз айларында орташа есеппен жеделдеп, бір жылға есептегенде 14,2% деңгейіне жетті. Бұған тарифтік реформалардың жалғасуы, проциклдік фискалдық ынталандыру және орнықты тұтынушылық сұраныс ықпал етті.
Ұлттық банктің Ақша-кредит саясаты комитетінің базалық мөлшерлеме бойынша шешімі 2025 жылы 5 маусымда сағат 12:00-де жарияланады.
Айта кетейік, бұған дейін де базалық ставка 16,5% деңгейінде еді. Ал оның алдында 2024 жылдың қараша айының соңында 15,25% болған.