Үш жылда бакалавр оқып шығу: Қазақстанда қай мамандықтардың оқуын қысқарту ұсынылды

Қазақстанда білікті кадрлардың жетіспеушілігіне байланысты Құрылтай депутаты Махамбет Хасенов "үш жылдық бакалавр" жүйесін жиі қолдануды ұсынып, елге тезірек қажет мамандықтардың тізімін атады. Бұл туралы Stan.kz ақпараттық агенттігі хабарлайды.

Депутаттың сөзінше, 2035 жылға дейін Қазақстанға 2,9 миллион маман қажет болады. Оның 1,8 миллионы – жұмысшы мамандықтары. Соның салдарынан көптеген кәсіптер толыққанды жұмыс істей алмай отыр.

“Компания қажетті мамандарды өз бетінше іздеуге, оларды қайта оқытуға және оған қосымша уақыт пен ақша жұмсауға мәжбүр," - деп түсіндірді депутат.

Хасенов 2030 жылға қарай жұмысшылардың 59 пайызы жаңа дағдыларды меңгеруі немесе біліктілігін арттыруы тиіс екенін атап өтті. Еңбек нарығына жаңа кадрларды тезірек шығару маңызды рөл атқарып тұр.

"Осыған байланысты білікті мамандарды үш жыл ішінде оқытып шығару ұсынылады. Үш жылдық формат – бағдарламаны жай ғана қысқарту емес. Мұнда қажетті білім мен құзыреттерді білім беру траекториясын тиімді ұйымдастыру арқылы қысқа мерзімде меңгерту көзделіп отыр", – деді ол.

Депутат барлық мамандық бойынша оқу мерзімін қысқарту мүмкін емес екенін айтты. Оның пікірінше, бұл IT, цифрлық технологиялар, маркетинг, сервис және туризм салаларына қатысты болуы мүмкін.

"Нарық пен технологиялар төрт жыл күтпейді. Білім беру жүйесі де экономикадағы өзгерістерден артта қалмауы керек. Үш жылдық формат маманның еңбек нарығына бір жыл ертерек шығуына, тәжірибе жинауына, табыс тауып, салық төлеуіне және кәсіпорында жұмыс істеуіне мүмкіндік береді", – деп түсіндірді Хасенов.

Премьер-министрге депутаттық сауал жолданды 

Махамбет Хасенов осы мәселеге қатысты Премьер-министр Олжас Бектеновтің атына депутаттық сауал жолдады. Ол үш шара ұсынды:

• Үш жыл ішінде сапалы маман даярлауға болатын мамандықтарды анықтау;
• Осы бағыттар бойынша триместрлік оқу, жазғы семестр, дуальды білім беру және кәсіпорындардағы тәжірибені пайдалана отырып, пилоттық жобаларды іске қосу;
• Салалық министрліктер еңбек нарығына қандай мамандар қажет екенін анықтап, түлектердің мамандығы бойынша жұмысқа орналасуына ықпал ету.

 Еске сала кетейік, бұған дейін редакция мемлекеттік гранттың өтеуі бойынша заңгермен сұхбаттасқан болатын.